Fyrstir koma fyrstir fá..

Nokkur eintök af krónu konunnar eru til sölu á kaffi Hljómalind.
Fleiri væntanleg.

Baráttujólakveðjur!

HITT í kvöld!

Vildi bara minna á jólahitt Femínistafélagsins í kvöld. Það verður upplestur úr þremur femínískum bókum sem eru að koma út fyrir jólin, söngkonan Hansa syngur nokkur lög, sýnt úr leikriti sem byggt er á smásögum Svövu Jakobsdóttur og einnig sýnd stuttmynd.

Það verður örugglega rosa gaman!
Sjáumst,
Steinunn

Næsta upplag á leiðinni!

Það má með sanni segja að krónunni okkar hafi verið vel tekið. Hún seldist upp á nokkrum dögum og var háður mikill slagur yfir seinustu eintökunum.
En ekki ber að óttast lesendur góðir því næsta upplag er í þann mund að koma til landsins. 2000 eintök lenda á Keflavíkurflugvelli þann 5. desember og munum við reyna að koma þeim fyrir vítt og breitt svo að áhugasamir geti nálgast eintak. Ef einhver búðareigandi skyldi vera að lesa þessa færslu þá erum við að leyta að fólki í góðri aðstöðu til þess að selja nælurnar.
Annars verður krónan seld áfram í Hljómalind en aðrir sölustaðir verða auglýstir síðar.

Sigríður Tulinius

Útúrsnúningur útúrsnúinn - skrifað í góðlálegu gríni, en þó einnig alvöru.

Mér hefur tekist að láta Sjálfstæðismenn á Íslandi ergja mig alla leið til Kanada. Þar ber helst að nefna athyglisverða grein sem ég fann inni á síðu Heimdallar þar sem stúlka ein, er heitir Erla, er neikvæð út í endurvakningu Kvennafrídagsins nú í haust Segir Erla að hún hefði viljað taka þátt í honum ef: "...aðalyfirskrift þessa frídags hefði verið að sýna þeim konum samstöðu sem létu í sér heyra fyrir 30 árum, þá hefði ég pottþétt mætt." Ég veit ekki hvernig það er hægt að sýna samstöðu aftur í tímann, og efast í raun um að það sé hægt en vissulega er hægt að heiðra gjörð þessara kvenna fyrir 30 árum síðan og var það m.a. gert á Kvennafrídeginum síðasta.

Erla segir einnig: "Jafnrétti fæst ekki með því að leggja niður störf og mótmæla." Nú langar mig til þess að telja upp mörg mótmæli sem hafa vakið fólk til umhugsunar og leitt til breytinga (sem oft hafa verið skref að auknu jafnrétti) en fyrir mér er það frekar ógáfulegt þar sem þetta er sambærilegt því að einhver myndi halda því fram að pizzur væru ekki til og ég myndi rjúka upp til handa og fóta og fara að telja upp allar þær pizzur sem ég hef lesið um, séð og bragðað og sagt viðkomandi að kíkja ofaní frystinn fyrir framan kjötborðið í Fjarðarkaupum og segja mér hvað hann sæi þar. Ég segi bara eins og Jón Sig forðum “Vér mótmælum allir" og segðu mér svo Erla góð hvort að þessi orð hafi ekki skipt neinu máli!

Í annan stað finnst mér svolítið mótsagnakennt að baráttumál Bolla, sem sóttist eftir sjöunda sæti hjá flokknum nýverið, virðast hafa verið um níu talsins og þar af snerta fjögur þeirra "Ungt fólk", enda Bolli sjálfur ungur (og efnilegur): "Ungt fólk til áhrifa" Að virkja ungt fólk "Borgin fyrir ungt fólk" Húsnæðismál ungs fólks, allt saman gott og blessað. Bolli fullyrðir einnig:
"Að loknum kosningum mun Bolli beita sér fyrir auknum hlut ungs fólks í nefndum [svo] borgarinnar."

Af þessu má sjá af unga fólkinu í Sjálfstæðisflokknum (ef hægt er að dæma aðeins út frá þeim Bolla og Erlu) finnst sjálfsagt að berjast fyrir hagsmunum unga fólksins, og auka hlut þess í nefnum borgarinnar, bara af því að þetta fólk er ungt. Oft þegar ég hef talað við ungt Sjálfstæðisfólk um að auka hlut kvenna í nefndum þá hefur iðulega verið sagt að það sé ekki hægt að veita konum aukin hlut "bara af því að þær eru konur." En það má greinilega auka hlut unga fólksins bara út af því að það er ungt. Þetta segi ég af því að hlutirnir eru orðaðir svona á síðunni hans Bolla en eflaust er hann ekki að meina "ungt fólk bara af því að það er ungt" heldur "ungt fólk sem er fært um að gera góð störf í nefndum" alveg eins og við femínistar meinum þegar við tölum um aukin völd kvenna ("konur sem eru færar um að sitja í nefndum og gera þar góð störf"). Sjálfstæðisfólk hefur oft viljað snúa út úr þessu: "Konur bara af því að þær eru konur", og leyfi ég mér því hér að beita þeirra eigin útúrsnúningum á þeirra eigin baráttumál.

Erla beitir einmitt þessum útúrsnúningi sjálf í grein sinni um kvennabaráttuna með eftirfarandi orðum: "Persónulega vil ég fá stöðu á mínum eigin forsendum og ekki vegna þess að það vantar konu í stöðuna." Og því leyfi ég mér að snúa þessum útúrsnúningum hennar í raun að baráttumálum Bolla sem vill allt fyrir ungt fólk gera og bara af því að það fólk er ungt. Þetta kallar maður "að láta ungt Sjálfstæðisfólk bragða á eigin meðali."

Grein Erlu er á heimdallur.is (undir nafninu kvennafrí) og baráttumál Bolla má sjá á http://www.bolli.is/?i=3

Tekið skal fram að undirrituð telur þó þau Erlu og Bolla vera mikil gæðablóð og svaka smart, þau beita aðeins öðrum hugsunarhætti en ég myndi kjósa til að betrumbæta umhverfi sitt.

Ritað hefur: Bryndís Björgvinsdóttir

KARLARÁÐSTEFNA


Ráðstefna eingöngu ætluð körlum


Karlaráðstefna um jafnréttismál verður haldin í Salnum í Kópavogi, fimmtudaginn 1. desember næstkomandi frá kl. 9-12. Ráðstefnan er eingönguætluð körlum, með þeirri undantekningu að Frú Vigdís Finnbogadóttir, fyrrverandi forseti Íslands, mun ávarpa ráðstefnuna og sitja hana sem verndari og heiðursgestur. Karlar eru hins vegar hvattir til að sækja ráðstefnuna og er aðgangur ókeypis meðan húsrúm leyfir.

Árni Magnússon, félagsmálaráðherra boðar til karlaráðstefnunnar. Að undirbúningi hennar með ráðherra hefur komið hópur manna, sem í sitja, Ari Edwald, framkvæmdastjóri Samtaka atvinnulífsins, Bjarni Ármannsson, forstjóri Íslandsbanka, Gunnar Páll Pálsson, formaður Verslunarmannafélags Reykjavíkur, Ingólfur V. Gíslason, sviðsstjóri á Jafnréttisstofu, Ólafur Stephensen, aðstoðarritstjóri Morgunblaðsins og Runólfur Ágústsson, rektor Viðskiptaháskólans á Bifröst. Allir munu þeir flytja framsöguerindi á ráðstefnunni og einnig mun Þráinn Bertelsson, rithöfundur flytja erindi.

Egill Helgason, sjónvarpsmaður, stýrir tvennum pallborðsumræðum á karlaráðstefnunni. Á öðru pallborðinu sitja ungir karlmenn úr stjórnmálaflokkunum þeir Bolli Thoroddsen, formaður Heimdallar, Egill Arnar Sigurþórsson, varaformaður Sambands ungra framsóknarmanna, Jens Sigurðsson, framkvæmdastjóri Ungra Jafnaðarmanna, Emil Hjörvar Petersen, varaformaður Ungra vinstri grænna og formaður VG í Kópavogi, og Andri Sigurðsson, í stjórn Ungra frjálslyndra. Á hinu pallborðinu sitja reynsluboltar, sem unnið hafa að ýmsum þáttum sem snúa að jafnréttismálum frá sjónarhóli karla. Þeir eru: séra Bragi Skúlason, Sigurður Svavarsson, bókaútgefandi og fyrrverandi formaður karlanefndar Jafnréttisráðs, Hafsteinn Karlsson, skólastjóri , Jón G. Hauksson, ritstjóri Frjálsrar verslunar og Hjálmar G. Sigmarsson, fulltrúi karlahóps Femínistafélags Íslands.

Þórhallur Gunnarsson, sjónvarpsmaður, verður ráðstefnustjóri.



Dagskrá karlaráðstefnunnar er eftirfarandi:

· 9:15 - 9:20 Ráðstefnan sett: Árni Magnússon, félagsmálaráðherra

· 9:20 – 9:30 Ávarp Frú Vigdísar Finnbogadóttir

· 9:30 – 10:20 Framsöguerindi:

· Atvinnulífið græðir á jafnrétti. Ari Edwald, framkvæmdastjóri Samtaka atvinnulífsins
· Jafnrétti á fjármálamarkaði. Bjarni Ármannsson, forstjóri Íslandsbanka
· Jafnrétti er allra hagur. Gunnar Páll Pálsson, formaður VR
· Á hverfanda hveli. Ingólfur V. Gíslason, sviðsstjóri hjá Jafnréttisstofu.
· Láta karlar verkin tala? Ólafur Stephensen, aðstoðarritstjóri Morgunblaðsins
· Veldur menntun misrétti? Runólfur Ágústsson, rektor Viðskiptaháskólans á Bifröst

· 10:20 – 10:40 Kaffihlé

· 10:40 – 11:00 Þráinn Bertelsson, rithöfundur.

· 11:00 – 11:51 Tvennar pallborðsumræður undir stjórn Egils Helgasonar, sjónvarpsmanns.

Ungir karlar úr stjórnmálaflokkunum
Reynsluboltar úr jafnréttismálum

· 11:51 - 11:59 Ráðstefnuslit – Árni Magnússon, félagsmálaráðherra




Nánari upplýsingar eru á:
http://www.felagsmalaraduneyti.is/frettir/frettatilkynningar/nr/2140

Myndir

Ójá! Myndasíða Ungliðahóps Femínistafélags Íslands hefur litið dagsins ljós. Myndirnar er hægt að nálgast með því að smella á linkinn MYNDIR undir Femíniskum tenglum. Nú er því loksins hægt að nálgast myndir frá hinni margumtöluðu og víðfrægu heimsókn í ráðherrabústaðinn þegar forsætisráðherra var afhend króna konunnar. Vona að ykkur líki vel.

Ásdís.

Nælt í háttvirtan forsætisráðherra.

Halldóri Ásgrímssyni, forsætisráðherra, var afhend króna konunnar í ráðherrabústaðnum í gær. Við afhendinguna mælti Halldór nokkur orð sem ungum femínistum þótti betur ósögð en hann ákvað þó að lokum að styðja okkur í baráttunni og bera merkið í barmi sér. Fjöldi fjölmiðla var samankominn til þess að fylgjast með athöfninni og fengum við því þónokkra umfjöllun í kvöldfréttum, Íslandi í dag og dagblöðum. Allt lítur út fyrir að króna konunnar sé að slá í gegn því hún selst eins og sjóðheitar og seiðandi lummur. Fyrsta pöntun er að verða uppseld og við bíðum því eftir þeirri næstu, en von er á henni eftir helgi. Það er því hver að verða síðastur að næla sér í eintak af þessari einstöku og æðsilegu krónu en hana er hægt að nálgast í Kaffi Hljómalind og Rauðakross búðinni á Laugaveginum.

KRÓNA KONUNNAR

Þetta er króna konunnar.
Í hana vantar 35%
Heildaratvinnutekjur kvenna eru 35% lægri en heildaratvinnutekjur karla á Íslandi.
Konur eiga því 35% minni pening en karlar.

Þetta er ekki jafnrétti.

VIÐ KREFJUMST ÞESS AÐ KRÓNA KVENNA VERÐI GERÐ JAFNSTÓR OG KRÓNA KARLA!

Staðreyndir:
Menntunarbilið hefur verið brúað en launabilið ekki.
Um 15% hreinn launamunur mælist á kynjunum, þ.e. konur fá 15% lægri laun fyrir sömu störf og karlar með sömu menntun og reynslu.
Hefðbundin kvennastörf eru metin til lægri launa en hefðbundin karlastörf.
Konur vinna frekar ólaunuð störf innan heimilis en karlar og taka því oftar að sér hlutastörf á hinum almenna vinnumarkaði.

VINNA KVENNA ER JAFNVERÐMÆT OG VINNA KARLA.
VIÐ ÞURFUM ÖLL AÐ TAKA AFSTÖÐU GEGN LAUNAMUNI KYNJANNA!

Ég hef ekki verið inná lengi núna.
Langaði bara að segja nokkra hluti.

í fyrsta lagi, hvernig fannst ykkur Kvennafrídagurinn? Ég var alveg í essinu mínu, standandi þarna á sviðinu með yndislegum konum að fara með leiklestur og sjá fólk langt sem augað eygði, fékk næstum kökk í hálsinn að fá að vera partur af prógramminu þennan dag.
Svo er það okkar frábæra króna,notaði tvær í dag sem eyrnalokka, mjög smart. Seldi krökkum í stúdentaleikhúsinu einhverjar og konur í vinnunni minni vilja líka fá sem er æði. Enda er ég í láglauna "kvenna" starfi á leikskóla.

Jæja mjög stutt innlegg en klukkan er meira en 2 og ég bara get ekki haldið athyggli í meira verð að fara að sofa, femínistar þurfa líka svefn!

Nadira

Króna konunnar í MR !

Í hádegishlénu í dag héldum við Ásdís kynningu á Krónunni í skólanum okkar, MR. Þrátt fyrir samkeppni um athygli við Framtíðina (annað nemendafélagið) var ágæt mæting í Hátíðarsal þar sem kynningin var haldin. Eitthvað var um spurningar og umræður en af þeim loknum ruku nælurnar út eins og heitar lummur. Við höldum áfram að selja restina úr heimastofum okkar (ég í C 204 í Casa Nova og Ásdís í H-stofu í Gamla skóla)

Í kringum 20 október létum við lista ganga um alla bekki skólans þar sem nemendur (og kennarar) voru beðnir um að veita undirskrift en þessir listar voru undir áskorun til rektors þar sem hann var beðinn um að veita öllum nemendum sem ætluðu í göngu þann 24. frí eftir klukkan 14.30. Ansi myndarlegur bunki myndaðist og rektor veitti fúslega frí.

Ef Framtíðin væri ekki með svokallaða Megaviku og ef Sólbjartur væri ekki í fullum gangi mundum við halda málþing eða eitthvað. Það verður að bíða betri tíma.

Ég hvet samt sem flesta að kynna krónuna í skólunum sínum, Mennta- sem háskóla.

Brynja Halldórsdóttir

Konur er konum bestar!

Ég var eins og í leiðslu alveg frá því að augun opnuðust morguninn 24. október 2005. Frá því skammdegið lagðist yfir eyjuna hef ég átt óskaplega erfitt með að drösla mér fram úr bælinu á morgnana en þennan morgunn stökk ég nánast á fætur. Í hátíðarskapi brunaði ég í skólann og eftir að hafa hlustað óþreyjufull á fyrirlestur kennarans brunaði ég aftur af stað til þess að hitta Ungliðahópinn. Á götunum mátti alls staðar sjá konur - allskyns konur. Þótt klukkan væri bara rétt rúmlega hádegi var veislubragur yfir femínistunum og dreginn var fram gítarinn og spilað Áfram Stelpur! Andrúmsloftið var rafmagnað og umræðurnar sífellt heitari.

Það voru ekki gæfulegir karlmenn sem urðu á mistök þennan dag. Þennan dag var ég kona sem þorði, gat og vildi.

Eftir að hafa hlustað nokkra umganga á plötuna Áfram stelpur var ferðinni heitið í annan stelpuklúbb. Á leiðinni í gegnum bæinn sló klukkan 14:08, konur lögðu niður vinnu, Rás 2 spilaði þemalag dagsins Áfram stelpur og það fór um mig gleðihrollur. Í næsta hópi voru kröfuspjöld sett saman í flýti og arkað af stað í átt að Skólavörðuholti. Á leiðinni voru konur, á holtinu voru konur og í göngunni voru konur. Konur í fríi því það var Kvennafrídagur.

Í magnaðri stemmningu niður Skólavörðustíg, Bankastræti og Austurstræti voru konur samstíga. Ég hrópaði mig hása, bjó til bylgjur með konunni hliðina á mér, passaði upp á vinkonur mínar og fílaði mig í botn í kröfugöngu, ásamt 50.000 kynsystrum mínum, fyrir virðingu og viðurkenningu á mínu kyni.

Ég hef nýtt mér þennan kraft sem dagurinn gaf mér. Hver og ein okkar verður að taka til í sínu horni. Verum gagnrýnar og jafnvel smámunasamar um umhverfi okkar. Látum ekkert óréttlæti óáreitt. Ef við gerum það ekki, gerir það enginn!

Eva Bjarnadóttir

NÝIR FÉLAGAR!

Nýir félagar eru ávallt velkomnir í hópinn! Hafið samband við ráðskonu hópsins Steinunni Gyðu- og Guðjónsdóttur í síma 690-3565 eða með tölvupósti stg3@hi.is. Næsti fundur hópsins verður haldinn föstudaginn 28. október kl. 16 á Kaffi Kúltúr. Allir velkomnir!

KRÓNA KONUNNAR

Þetta er króna konunnar.
Í hana vantar 35%
Heildaratvinnutekjur kvenna eru 35% lægri en heildaratvinnutekjur karla á Íslandi.
Konur eiga því 35% minni pening en karlar.

Þetta er ekki jafnrétti.

VIÐ KREFJUMST ÞESS AÐ KRÓNA KVENNA VERÐI GERÐ JAFNSTÓR OG KRÓNA KARLA!

Staðreyndir:
Menntunarbilið hefur verið brúað en launabilið ekki.
Um 15% hreinn launamunur mælist á kynjunum, þ.e. konur fá 15% lægri laun fyrir sömu störf og karlar með sömu menntun og reynslu.
Hefðbundin kvennastörf eru metin til lægri launa en hefðbundin karlastörf.
Konur vinna frekar ólaunuð störf innan heimilis en karlar og taka því oftar að sér hlutastörf á hinum almenna vinnumarkaði.

VINNA KVENNA ER JAFNVERÐMÆT OG VINNA KARLA.
VIÐ ÞURFUM ÖLL AÐ TAKA AFSTÖÐU GEGN LAUNAMUNI KYNJANNA!

KYNLEGT ÆVINTÝRI!

Þessi saga var sett í kommentakerfi á bloggsíðu hjá vinkvennahópnum mínum af honum Alla. Hún er bara svo fyndin að ég verð að deila henni með ykkur :o)

Steinunn Gyðu- og Guðjónsdóttir

Einu sinni var ...

Endur fyrir löngu, í landi langt langt í burtu, rakst falleg, sjálfstæð og sjálfsörugg prinsessa á frosk þar sem hún sat og velti vöngum yfir vistfræðilegum álitamálum við bakka ómengaðrar tjarnar á fagurgrænu engi nálægt kastalanum sínum. Froskurinn stökk upp í kjöltu prinsessunnar og sagði: Fagra frú, ég var eitt sinn gjörvilegur prins en grimm norn lagði á mig álög. Ef þú smellir á mig einum kossi mun ég aftur verða að þeim snotra prinsi sem ég raunverulega er. Þá getum við, mín kæra, gifst og stofnað heimili í kastalanum þínum. Þú getur framreitt málsverði fyrir mig, þvegið klæði mín, alið börnin mín og fundið til þakklætis og hamingju um alla eilífð.

Sama kvöld sat prinsessan yfir málsverði sínum – léttsteiktum froskalöppum og hló lágt með sjálfri sér: Ég held nú fokking síður!

SAGAN HENNAR MÖMMU


Hér fyrir neðan er sagan hennar mömmu (það er gaman að líta upp til flottra kvenna, sérstakleg þegar þær eru mömmur mans). Sagan er dæmisaga um að það er allt hægt og á sérstaklega að vera hvatning fyrir þær góðu konur sem eru úti á landi, í útlöndum eða á sjónum að taka þátt í fríinu þrátt fyrir engan skipulagðan fund. Mótmælin felast í einstaklingsframtakinu!

Árið er 1975, mamma er tvítug og með rauðar fléttur í hárinu. Um miðjan október var hún að leggja upp í sína aðra ferð á millilandafraktskipinu Fjallfossi. Í þetta skiptið var ferðinni heitið til Póllands og Rússlands en skipið sigldi úr höfn frá Akranesi. Áhöfnin samanstóð af 25 karlmönnum og þremur konum sem allar unnu sem þernur, þar á meðal mamma.
Mamma hafði þegar í fyrstu ferðinni valdið uppþotum á skipinu þegar hún í þöglum mótmælum gegn kvenfyrirlitningu í matsalnum hengdi upp miðjuplakatið úr Playgirl við hliðina á plakatinu með beru stelpunni úr Playboy. Þegar þarna var komið við sögu hafði skipið verið aðeins nokkra daga á sjó í annarri ferð mömmu og kvennfríið stóð fyrir dyrum. Daginn áður hvatti hún samstarfskonur sínar til að standa með sér í fríinu en þær voru nokk ragar við það og svolítið hræddar. Baráttugleði mömmu sannfærði þær og ákveðið var að mæta ekki til vinnu þann 24. október.

Venjulegur vinnudagur hófst kl. 8 að morgni en konurnar á Fjallfossi lágu þá enn í rekkju. Það fréttist um skipið að konurnar væru að mótmæla og um tíuleytið komu skipherra, 1. vélstjóri og 1. stýrimaður niður í káetu til þeirra og færðu þeim kopp, klósettrúllu og handklæði þar sem þær lokuðu sig þarna inni. Þeir hlógu sjálfir manna hæst og héldu að með þessi sprelli sínu væri gamanið búið og stelpurnar myndu drattast á lappir og vinna sína vinnu. Þeim varð ekki að ósk sinni því mamma hvatti til þess að þær yrðu í náttsloppunum allan daginn.

Mennirnir í undirmannamessanum gengu í störf kvennanna og skiptu verkum sín á milli. Einn þreif djúpa diska, annar hnífa, sá þriðji gaffla og fjórði skeiðar. (Karlarnir voru víst voða ánægðir að afreka þetta.) En í yfirmannamessanum var brytinn ræstur út sem var ýldumyglaður yfir að þurfa að ganga í störf stúlknanna og vaska upp könnur og glös eftir skipherrann og mennina hans (það var ekki möguleiki að þeir gerðu það sjálfir). Þegar leið á daginn var andrúmsloftið um borð orðið ansi þrúgað, menn voru fúlir og komu trekk í trekk niður til að hvetja konurnar að koma upp og vinna. Þetta væri ekkert fyndið lengur...

Þær þrömmuðu í matsalinn (vinnustað sinn) og fengu sér að borða, á náttsloppunum og þær þrömmuðu til loftskeytamannsins, á náttsloppunum. Loftskeytamaðurinn varð mjög taugaveiklaður þegar þær komu að máli við hann til að senda skeyti á baráttufundinn á Lækjartorgi sem fram átti að fara þennan dag. Hann spurði þær aftur og aftur hvort þær ætluðu í alvöru að senda það og ætlaði hreinlega ekki að þora að gera það fyrir þær. En þær fengu sitt fram og eftirfarandi skeyti var morsað á fundinn:

utifundur a lækjartorgi
24 okt
reykjavik

m/s fjallfoss staddur a 61,14 gradur nordur og 01,40 gradur vestur
sendum barattu kvedjur i tilefni dagsins
stöndum saman jafnt a sjo sem landi
Kristin gyda regina m/s fjallfoss


Daginn eftir voru konurnar vaktar áður en þær áttu að mæta til vinnu. Sendimaður frá skipherra flutti þau boð að þær skyldu koma rakleiðis til fundar við skipherrann. Nú áttu þær að fá það óþvegið, nú yrði messað yfir þeim, hugsuðu þær með sér.

Þegar upp kom opnaði skipherra og tók blaðskellandi á móti þeim. Mamma hafði ekki áður fengið að koma þarna inn og fannst það bara svoldið gaman. Hann bauð þeim sæti og þær fengu kaffi og með því (gott ef þær fengu ekki bara í glas líka). Hann hafði gleðifregnir að færa. Konan hans hafði hringt í hann í gegnum radíóið og spurt hvurslags frábæru konur hann hefði þarna um borð. Skeytið frá konunum á Fjallfossi hafði verið lesið upp á fundinum og vakið stormandi lukku sagði hún og tíundaði það við hann að hann væri heppinn að hafa svona konur um borð. Karlinum var snúið einn, tveir og þrír og nutu þær góðs af þessu það sem eftir var ferðarinnar.

Mamma fór ekki fleiri ferðir með Fjallfossi en ég vona að verkfallið hafi skilað einhverju til frambúðar. Ég vona að kröfugangan okkar á mánudaginn komi til með að skila einhverju til frambúðar.

Stöndum saman jafnt á sjó sem landi!
Steinunn Gyðu- og Guðjónsdóttir

HVERS VEGNA KVENNAFRÍ?

…atvinnutekjur kvenna eru aðeins 64,15% af atvinnutekjum karla
…konur eru með 72% af launum karla fyrir jafnlangan vinnutíma
…barneignir hafa neikvæð áhrif á laun kvenna en jákvæð áhrif á laun karla
...margar konur búa við öryggisleysi og ógn á heimilum sínum
…ein af hverjum þremur konum verður fyrir kynbundnu ofbeldi á lífsleiðinni
...konur uppskera ekki í samræmi við menntun sína
…konur í fyrirtækjarekstri hafa verri aðgang að fjármagni…ábyrgð á umönnun barna og heimilisstörfum er enn að mestu á höndum kvenna
...umönnunarstörf eru með lægst launuðu störfum á vinnumarkaði
...rödd kvenna er veik í fjölmiðlum
...litið er á líkama kvenna sem söluvöru
…kona hefur aldrei verið forsætisráðherra, bankastjóri eða biskup
...konur hafa aldrei verið helmingur þingmanna
...konur njóta ekki jafnréttis á við karla
....þessu þarf að breyta. Ég þori, get og vil!

KONUR SÝNUM SAMSTÖÐU

Leggjum niður störf á Kvennafrídaginn 24. október kl. 14.08 og fyllum miðborgina svo eftir verði tekið – eins og fyrir 30 árum.
Hittumst á Skólavörðuholti kl. 15 og förum í kröfugöngu.
Baráttufundur á Ingólfstorgi kl. 16.

Reuters
Pamela prýðir bókasýninguna í Frankfurt
Bókasýningin í Frankfurt hefst formlega í vikunni. Þessi sýning er stærsta bókasýning heims og að þessu sinni verður hún einkum helguð kóreskum bókmenntum. Án efa mun þó þetta risastóra veggspjald, með mynd af kynbombunni Pamelu Anderson, ekki vekja síðri athygli en kóresku bækurnar en starfsmenn sýningarinnar voru í morgun að ljúka við að festa myndina á vegg sýningarhallarinnar í Frankfurt. Sjá www.mbl.is

-Er þessi bókasýning svona óáhugaverð að aðstandendur hennar þurfa að veifa risastóru brjóstaplakati til að fólk komi á sýninguna ?

Brynj H

Ansi skemmtileg síða sem bent var á á póstlista femínistafélagsins.

Smellið á slóðina hér að neðan, smellið á mynd, leyfið henni að hlaðast inn, settu músina yfir myndina og sjáðu hvernig hún var FYRIR breytingar.

http://www.glennferon.com/portfolio1/index.html

Stærri rassar, minni rassar, stærri brjóst, fellingar burt, nýtt litaraft o.s.frv. o.s.frv.


Steinunn G.G.

Um vísindakonur.

Vídjótímar hafa alltaf verið vinsælir meðal nemenda í kennslustundum og var einn slíkur í stjörnufræðitímanum í dag. Við horfðum á þáttinn “The planets” þar sem tunglið var tekið til sérstakrar athugunar. Í þættinum voru tekin fjölmörg viðtöl við sovéska og bandaríska vísindamenn sem áttu þátt í að koma fyrstu mönnunum til tunglsins. Ég tók strax eftir því að aðeins einn viðmælendanna var kona, enda fáar konur í vísindum á þessum tíma. Þessi kona var doktor í efnafræði og átti mikilvægan þátt í að efnagreina bergsýni frá tunglinu. Það fáránlega við þetta allt saman var hinsvegar, að viðtölin sem tekin voru við vísindakarlana voru tekin upp á eldflaugapöllum eða á rannsóknarstöfum þar þeir voru að handleika sýni en viðtalið við konuna var tekið upp í eldhúsinu hjá henni þar sem hún var að skræla kartöflur!! Hvað er eiginlega í gangi hérna?? Er vísindakonan búin að ráðast um of á veldi vísindakarlanna, orðin of “karlaleg”, þannig að þörf er á að gera hana aðeins “kvenlegri”??

Svo að ég fái að ausa enn frekar úr jafnréttis- og reiðibrunni mínum, þá er eftirfarandi klausa tekin úr stjörnufræðibókinni minni, “Samtíningur í stjarnfræði”. Hana er hægt að nálgast í bóksölu MR.

“Iðustraumar þessir [iðustraumar í möttli jarðar] eru ekki ósvipaðir því sem hin dæmigerða húsmóðir í vesturbænum hefur orðið vitni að í venjulegum súpupotti, heitur vökvi rís á einum stað en kólnar við yfirborðið og sekkur aftur niður í djúpið á öðrum stað.”

Þetta þykir mér algjörlega óþörf líking og hvað þá að hafa hana í kennslubók! Hún endurspeglar augljóslega lélegan karlrembuhúmor höfundar sem er algjörlega óviðeigandi í bók sem þessari.

Til þess að enda þetta á léttu nótunum við ég koma því að, að sjónvarpsauglýsingarnar frá VR eru geggjaðar. Luv them.

Ásdís Egilsdóttir

Viðskiptafræðikennari með jafnréttishugsjón?

Já, viðskiptafræðin er ekki endalaus skemmtun þótt hann Mankiw geti auðveldlega glatt mitt stóra hjarta. Vandinn er sá að viðskiptafræðikennarinn er sneyddur allri jafnréttishugsjón og segir oft eitthvað miður skemmtilegt sem fer verulega í taugarnar á mér.

Dæmi, (haft eftir kennaranum):

"Setjum sem svo að hjón með 3 börn séu bæði útivinnandi. Öll börnin eru á leikskólaaldri og augljóslega eru því leikskólagjöldin á því heimili afar há. Þá er spurning hvort hagstæðara sé fyrir mömmuna að vinna úti fyrir leikskólagjöldunum eða gæta barnanna sjálf."

Hagstæðara fyrir mömmuna? Hvar kemur pabbinn inn í málið, Hr. Viðskiptafræðikennari?

Vissulega er mér ljóst að þessi ummæli kennarans gætu hafa verið sögð í flýti og án umhugsunar og því er honum að sjálfsögðu fyrirgefið. Vegna þessa atviks áttaði ég mig hinsvegar á því hversu gríðarlega mikilvægt það er að kennarar kenni út frá jafnréttissjónarmiðum. Kennarar eru fyrirmyndir og börn taka upp þær hugmyndir sem kennararnir halda uppi. Samfélagið okkar á að heita jafnrétissinnað og því ber kennurum skylda að kenna í anda jafnréttis í stað úreltra og andfeminiskra gilda.

Viðskiptafræðikennarinn minn er engu að síður viðkunnalegur náungi og mér líkar alveg ágætlega við hann. Ég þyrfti helst bara að mæla mér mót við hann og kenna honum sitthvað um feminsma.

Ásdís Egilsdóttir

Láttu ekki útlitið blekkja þig!

Mig langar til að hrósa VR fyrir að rannsaka og afhjúpa launamun kynjanna. Einnig vil ég hrósa þeim þekktu Íslendingum sem tóku þátt í auglýsingaherferðinni. Helmingur þeirra sem fengu senda til sín fyrirspurn tóku þátt í rannsókninni. Niðurstöðurnar eru teknar af www.vr.is

Launamunurinn óbreyttur síðustu þrjú ár
Karlar hafa 23% hærri heildarlaun en konur, samkvæmt niðurstöðum launakönnunar VR 2005. Kynbundinn launamunur, þ.e. þegar búið er að taka tillit til vinnutíma, aldurs, starfsaldurs, stéttar og menntunar, er 14%. Þetta er óbreytt frá í fyrra. Samkvæmt niðurstöðunum hafa karlar 337 þúsund á mánuði að meðaltali í heildarlaun á móti tæplega 274 þúsund.


Ekki er marktækur munur á launamun kynjanna, hvort sem litið er til heildarlauna eða kynbundins launamunar, síðustu þrjú ár. Ekki er að sjá að aðrar tekjur kvenna, hlunnindi af einhverju tagi eða meiri sveigjanleiki í starfi vinni upp á móti þessum launamun. Kynið eitt kostar konur því tugi þúsunda á mánuði.

Karlar fá meiri hlunnindi og aðrar launagreiðslur
Það hallar verulega á konurnar þegar hlunnindi og önnur laun eru greind eftir kyni. Fleiri karlar hafa hlunnindi sem hluta af launakjörum, 75% á móti 66%. Þeir fá t.a.m. frekar síma og símakostnað greiddan, bílastyrk og /eða afnot af bíl, tölvu og tölvutengingu á heimilið. Bílastyrkur karla er marktækt hærri en kvenna, tæplega 16 þúsund á mánuði á móti rúmlega 12 þúsund hjá konum.

Rúmlega einn af hverjum tíu félagsmönnum fær önnur laun en þessar hefðbundnu launagreiðslur, s.s. bónus, sölulaun og afkastatengdar greiðslur. Fleiri karlar fá þessar greiðslur en konur, 12% á móti 8%, og eru karlar með tvöfalt hærri greiðslur eða 59 þúsund á mánuði að meðaltali á móti 28 þúsund hjá konunum.


Launamunur kynjanna, m.v. heildarlaun

Munur á meðallaunum Kynbundinn launamunur
2000 26% 18%
2001 25% 16%
2003* 22% 14%
2004 22% 15%
2005 23% 14%

* Launakönnun var ekki gerð árið 2002.


Brynja H

Viðskiptafræði rokkar!

Ég lá sveitt yfir viðskiptafræðibókinni minni í gær, Principles of Economics by Mankiw, því próf úr nokkrum köflum bókarinnar var í dag. Hann Mankiw á sko hrós skilið því jafnréttissinnaðri kennslubók hef ég aldrei lesið! Undarlegt en satt þá hreinlega brá mér fyrst þegar ég sá eftirfarandi málsgrein:

If the farmer devotes all his time to potatoes, he grows 32 ounces of potatoes. Conversely, if the rancher devotes all her time to potatoes, she grows 48 ounces.

Hérna er gengið út frá því að "the rancher" sé kona ólíkt þeirri venju að flokka mörg slík starfsheiti sem karlkyns, sbr. "Læknirinn fór á KFC. Hann keypti sér kjúklingaborgara." En Mankiw heldur áfram í bókinni og hikar ekki við að tala um "physicians" og "landlords" sem konur. Þessa jafnréttishugsun skortir flestar kennslubækur og því fær Mankiw gott og veglegt prik í hattinn frá mér. Ég get ekki beðið eftir því að láta Mankiw koma mér skemmtilega aftur á óvart og ætla því að sökkva mér aftur í lestur.

Lifi jafnréttissinnuð viðskiptafræði og GO Mankiw.

Ásdís Egilsdóttir

Bara stutt...

Vildi bara segja að ég er oft í femínistabolnum mínum sem stendur á "Föt fara konum vel" ég fæ mjög mikla athyggli út á hann og fólk kemur oft til mín og spyr mig út í bolinn. Ég var bara á Kaffibarnum í gær og tvær stelpur komu og spurðu mig út í þetta og hvar væri hægt að fá bolinn og svona. Ég mæli bara með að ef þið eigið svona femínistaboli að vera í þeim út um allt, bera út boðskapinn;)
Sjáumst á eftir
Nadira

Ertu draumakona hvers manns?

1.Manninn þinn langar til þess að njóta ásta og þú ert að drepast úr höfuðverk. Þú:
a)Tekur verkjapillu og lætur þig hafa það
b)Segir nei
c)Kyssir hann og knúsar og færð hann til að fresa því til morguns

2.Maðurinn þinn á í erfiðleikum í vinnunni og stoltið er verulega sært.Þú:
a)lítur á það sem hans vandamál og neitr að ræða málið
b)Gefur honum góð ráð
c)gerir allt sem þú getur til að styrkja særða egóið hans

3.Þú finnur "karlablöd" undir rúminu ykkar.Þú:
a)Öskrar á hann og krefst útskýringa
b)Skilur þau eftir þar sem þau voru
c)Dregur þau fram þegar vel liggur á ykkur og leggur til að þið skoðið þau saman til þess að krydda kynlífið

4.Þú áttir eriðan dag. Hvað gerirðu þegar maðurinn kemur heim?
a)Byrjará því að vorkenna þér um leið og hann kemur inn
b)Lætur ekki ergelsið bitna á honum
c)Biður hann um að setjast niður og ræða málin

5.Þið eruð ósammála um eitthvað málefni í marga daga.Þú færð sönnun fyrir því að þú hefur rétt fyrir þér. Þú:
a)Lætur málið falla niður
b)Veltir honum upp úr sannleikanum
c)Stillir þig um að hoppa af gleðiþergar þú serð svipinn á honum

6.Tengdamamma var vön að elda þungan og óhollan mat handa drengjunum sínum.Þú:
a)Viðheldur venjunni á kostnað heilsunnar
b)Minnkar skammtana og laumar einhverju hollu í matinn án þess að hann uppgötvi það.
c)Breytir matarræðinu fullkomlega og bannar honum að borða óhollan mat.

7.Maðurinn þinn er haldinn ósiðum.Þú:
a)Ert alltaf að skamma hann
b)Kvartar aldrei
c)Stríðir honum með ósiðunum

8.Þú heldur honum heljarinnar afmælisveislu og býður öllum vinum hans.Þeir verða dauðadrukknir og allt fer úr böndunum.Þú:
a)Yfirgefur samkvæmið.Boys will be boys
b)Hellir upp á kaffi
c)Kveikir á enska boltanum í sjónvarpinu

9.Maðurinn þinn er áhyggjfullur en neitar að tjá sig um malið´.Þú:
a)lætur hann í friði
b)Færð hann til að tala
c)Nöldrar íhonum þar tl allt sem í háa loft

Þetta var vikulegt persónuleikapróf úr Vikunni. Því undirgefnari sem kona er, því hærri stig fær hún og telst því "draumakona hvers manns" Ég hlaut 70 stig, og þar af leiðandi niðurstöðu. Mín niðurstaða segir í stuttu máli að ég sé langt frá því að vera draumadís og að "ég sé of ógnandi" Hefði ég fengið minna en 40 stig ætt ég að "slaka á og hætta gagnrýni", hefði ég fengið 125-155 stig ætti ég að "sýna meiri sveigjanleika" og ég hefði fengið 160-180 stig hefði kærasti minn "dottið í lukkupottinn!"

Ég hringdi í Vikuna í dag og bað um samband við ritstýru sem er víst í fríi. Lagð ég því fram formlega kvörtun en fékk í leiðinni svarið að þetta "hefði bara verið grín" "Grín" eður ei, þá bitnar það á konum sem stúlkum sem trúa því margar hverjar að undirgefni sé sjálfsagður og jákvæður eiginleiki í fari hverrar konu.

Einnig þykir mér þetta lítilsvirðing við karlmenn. Hví ættu sannir karlmenn að vilja persónulausa Barbíedúkku sem reynist þeim sem gólftuska?

Brynja H

Þóra fékk ryksugu

Þóra B. Helgadóttir, markvörður A landsliðs kvenna í knattspyrnu, var valin maður leiksins í viðureign Svíþjóðar og Íslands í undankeppni HM 2007 síðastliðinn sunnudag, en liðin mættust í Karlskoga í Svíþjóð. Í viðurkenningarskyni fékk Þóra afhenta forláta ryksugu að gjöf frá aðstandendum leiksins.

Þóra er afrekskona, í líkamlega góðu formi og dugleg þar að auki. -Er hún svo ógnandi að aðstendendum keppninnar finnist þeir knúnir til að halda henni "kvenlegri"? Hvaða skilaboð er verið að senda stúlkum sem vilja brjótast út úr glerbúrinu, verða sterkbyggðar og líkamlegir jafningjar drengja? Eiga þær frekar að svelta sig til hlýðni, fara í pils og ryksuga? Ég efast um að kærkomnu "Strákar okkar" í boltanum fái bjórkút eða bor í verðlaun þegar þeir vinna til verðlauna

Brynja H

Hjartfólgið nöldur

Eftirfarandi frétt er tekin af heimasíðu Morgunblaðsins:

Hjartveikar konur fá ekki sömu meðferð og hjartveikir karlar samkvæmt nýrri rannsókn
Konum sem bera einkenni hjartveiki er ekki sinnt jafn vel og körlum með sömu einkenni, að því er fram kemur í niðurstöðum nýrrar rannsóknar sem gerð var um alla Evrópu og var kynnt í Stokkhólmi í dag. Niðurstöðurnar eru byggðar á rannsóknum á 3.779 sjúklingum í 32 löndum í Evrópu.

Þær leiddu í ljós að konur með verk fyrir brjósti eru ekki teknar eins alvarlega og karlar með brjóstverki, og þær fá ekki eins góða meðhöndlun og karlar. Konur með verki fyrir brjósti eru 20% ólíklegri en karlar til að vera settar í álagspróf, sem er fyrsta skref í því að staðfesta að um hjartveiki sé að ræða.

Í niðurstöðunum kom þó fram að nokkur bæting varð á meðferð á konum með einkenni hjartveiki á milli áranna 2000 og 2004. „Þetta er skref í rétta átt, en við verðum að gera meira til að koma fólki í skilning um að hjartveiki er alveg jafn mikið vandamál á meðal kvenna og karla,“ sagði Eva Swahn, yfirmaður sænsku hjartaverndarsamtakanna.

Hjartaáfall er algengasta dánarorsök kvenna í Evrópu og fleiri konur deyja af völdum þess en af völdum allra tegunda krabbameins. 55% kvenna deyja af völdum hjartaáfalls en 43% karla.

Orðin hér að ofan, um "nöldrandi" konur, með hönd fyrir hjartanu, ekki teknar alvarlega, koma mér ekki sérstaklega á óvart. Það sem sló mig einna mest var hversu hátt hlutfall kvenna deyr sökum hjartaáfalls. Ég kalla það hins vegar gott hjá sænsku hjartverndarsamtökunum að vekja athygli á málinu.

Brynja H

Bretar banna ofbeldisklám?

Breska ríkisstjórnin hyggst leggja fram lagafrumvarp þar sem varsla ofbeldistengds kláms verður gerð refsiverð.Bretland yrði fyrst Vesturlanda sem bannaði slíkt.
Kveikjan að banninu er morð á konu sen var kyrkt af kunningja sínum.Hann viðurkenndi að sækja mjög í slíkt klámefni. Samtök sem berjast gegn klámi fögnuðu fréttunum en baráttuhópar fyrir skoðanafrelsi segja ekkert benda til þess að ofbeldisklám leiði af sér ofbeldishegðun.
Auk ofbeldiskláms yrðu dýraklámmyndir og myndir af náriðlum bannaðar.

Hvað er ofbeldisklám? Klám er í heild sinni ofbeldisfullt, sé ekki um erótík að ræða. Engu að síður finns mér frumvarp sem þetta gott framtak. -Hvað finnst ykkur?

Brynja H

Verðum framkvæmdastjórar KEA:

Fyrirtækið KEA auglýsir eftir framkvæmdastjóra en hún birtist í atvinnuauglýsingum Morgunblaðsins á dögunum.

Framkvæmdastjóri
Stjórn KEA svf. óskar eftir að ráða framkvæmdastjóra.
Starfssvið
o Öll almenn framkvæmdastjórn og yfirumsjón með öllum verkefnum félagsins samkvæmt samþykktum og starfsreglum þess.
o Ábyrgð á fjárreiðum, fjárvörslu og ávöxtun fjármuna félagsins og yfirstjórn einstakra sviða.
o Vera formælandi félagsins út á við og gæta hagsmuna þess í hvívetna.
o Hafa frumkvæði að stefnumótun, þróun og skipulagi félagsins.
o Leggja upp og undirbúa verkefni stjórnar, umfjöllun og úrvinnslu.
o Framkvæmdastjóri er stjórnarformaður Hildings og Framtakssjóðsins.
Hæfniskröfur
o Háskólamenntun er æskileg.
o Áhersla er lögð á að umsækjandi hafi umtalsverðan styrkleika sem leiðtogi og sem talsmaður og formælandi félagsins. Eigi auðvelt með að leggja upp mál og greina, hafi jafnframt góða þekkingu og tengingu við fyrirtækjaumhverfið.
o Reynsla af stjórnunarstörfum og/eða haldgóð þekking á fjárfestingum í atvinnulífi er mikilvæg.
Með allar umsóknir verður farið sem trúnaðarmál.
Umsóknir óskast fylltar út á www.hagvangur.is fyrir 27. ágúst nk. Númer starfs er 4753. Upplýsingar veita Þórir Þorvarðarson og Baldur Jónsson. Netföng: thorir@hagvangur.is og baldur@hagvangur.is.

Skorað er á sem flesta að senda inn umsókn !

Brynja H

Bravó, Árni

Sem og margir aðrir tek ég ofan fyrir Árna Magnússyni, félagsmálaráðherra fyrir framgöngu hans í réttindabaráttu samkynhneigðra. Hann vill að samkynhneigð pör fái "sömu möguleika og gagnkynhneigð pör að skrá óvígða sambúð hjá Hagstofunni, rétt á að ættleiða íslensk eða erlend börn til jafns á við gagnkynhneigð hjón eða einstaklinga, lesbíur fái sama rétt til tæknifrjóvgana og gagnkynhneigðar konur og einnig að samkynhneigt fólk geti óskað eftir því að prestar eða forstöðumenn safnaða gerist vígslumenn þeirra sem hyggjast ganga í staðfesta samvist. Þar að auki
hyggst hann auka fræðslu í skólum um samkynhneigð til að sporna við fordómum"

Þetta eru allt sjálfsögð mannréttindi. Þess vegna vakti skoðanakönnun í Fréttablaðinu undrun mína. Spurningin var þessi: Styður þú réttindabaráttu samkynhneigðra? 56% svöruðu JÁ, 44% svöruðu NEI. 44 prósent! Hversu margir ætli hafi tekið þátt í þessari könnun ?

Einnig vekur KEA-málið viðurstyggð mína en það hefur verið þaulrætt undanfarna daga.

Brynja

Hvernig sjáum við kynjakvóta?

Í aðdraganda sveitastjórnakosninga hefur Vinstri hreyfingin-Grænt framboð ákveðið að bjóða kjósendum svokallaðan fléttulista. Hann felst í því að atkvæðahæsti einstaklingurinn trónir í fyrsta sæti listans. Óháð atkvæðafjölda skal einstaklingur í öðru sæti vera af gagnstæðu kyni, þriðja sæti af sama kyni, fjórða sæti af gagnstæðu kyni osfr. (Sé þetta óljóst er nánari upplýsingar að finna á www.vg.is)

Sitt sýnist hverjum um þetta fyrirkomulag. Mótrökin benda á að kynjakvóti mismuni fólki sökum kyns, að það lendi neðarlega en ella á framboðslista þrátt fyrir mikinn atkvæðafjölda. Þ.a.l. sé lýðræðið ekki virt.

Konur hafa frá upphafi átt erfitt uppdráttar í pólitík, á Íslandi sem annarsstaðar. Við efumst varla um að þær séu óhæfari stjórnendur en karlar (eða hvað?) en samt hljóta þær sjaldan kosningu. Konur nýta kosningarrétt sinn í ríkari mæli en karlar. Kvenkyns pólitíkusar verða oft fyrir aðkasti á fáránlegum forsemdum (sbr fyrir klæðaburð, slíkt heyrum við ekki um karlkyns pólitíkusa: "Oj, Dabbi er alltaf í sömu jakkafötunum" eða "Össur er með ljótt bindi") Hverjir velta klæðaburði háttsettra kvenna fyrir sér? -Jú, konur!

"Konur eru konum verstar" getur það staðist? Karlar standa vissulega saman, það sést bæði í pólitík sem raunveruleikaþáttum. Ég lít á kynjakvóta sem tilraun enda hefur aðferð síðustu 7000 ára brugðist. Ég bíð spennt eftir niðurstöðu tilraunarinnar á kosninganóttina 2006.

Brynja, dóttir Hildar og Halldórs

Að pissa á fólk



Um daginn voru tónleikar með Snoop Dogg. Ég sá mér nú ekki fært að mæta sjálf en veit um marga sem fóru og skemmtu sér prýðilega. Koma rapparans hefur vakið deilur enda sum efni texta hans sem hvetja til ólöglegs athæfis eða niðurlægjandi og ógeðslegra hluta. Ýmsir hafa bent á að það er kannski ekki eðlilegt að hafa þetta fyrir börnum, unglingum já og bara öllu fólki.

En þó margir hafi hreyft andmælum við komu hans held ég þó að fleiri hafi lagt málstað hans lið. Margir segjast þreyttir á „þessum kerlingum sem væla yfir öllu“. Fleiri tala þó um listrænt frelsi og skoðanafrelsi, en því er iðulega beitt þegar menn vilja hafa frelsi til að hafa við klám í textum sínum eða annað sem er ólöglegt. Skemmtilegustu rökin þóttu mér þó koma frá rappara sem finnst fyrst og fremst hallað á rappheiminn í þessu þjóðfélagi en ekki konur. Hann sagði: „Sko, rappheimurinn er ekkert eins og Ísland. Sumar konur í rappi eru einfaldlega hórur.“

Það sem helst hefur þó verið sagt honum til varnar er að þetta sé eiginlega bara hystería í femínistum og að enginn eigi eftir að taka mark á manninum. Til dæmis eigi enginn eftir að pissa á fólk bara vegna þess að Snoop kom til landsins en mikið hefur verið rætt um texta hans þegar hann segir að það sé sniðugt að pissa á konur.

Ég aftur á móti tel mig geta sannað að Snoop Dogg hefur orðið ýmsum mönnum innblástur um helgina. Ég varð nefnilega fyrir því óskemmtilega atviki um síðustu helgi að það var pissað á mig. Eða réttara sagt pissuðu nokkrir óvinir mínir í glas og köstuðu á mig þar sem ég klifraði í tré. Þetta gerðist sama sólarhring og Snoop hélt tónleika.

Sumum finnst kannski fyndið að venjulegt fólk eigi sér óvini. Mér er sagt að bara James Bond eigi óvini. Aftur á móti er snúið að segja þessa sögu án þess að kalla mennina óvini. Þeir eru í það minnsta ekki vinir mínir. Það sem felst í vináttu er jú meðal annars hvað maður neitar sér stöðugt um að pissa á vini sína, eins og það er nú annars eðlilegt að pissa á fólk. Bara ekki á vini sína.

Ef einhver efast um að Snoop hafi haft tækifæri til að menga huga pissara míns þá hef ég áreiðanlegar heimildir fyrir því að téður óvinur minn fíli hann í tætlur. Heimildarmenn mínir í Egilshöll sáu hann á tónleikunum. Hann hefði varla keypt sér dýra miða á tónleikana ef hann hefði aldrei hlustað á rapparann. Þannig að það er ekki ólíklegt að hann hafi heyrt uppástungu Snoops um að pissa á fólk áður en hann pissaði á mig. Mér finnst varla þurfa frekari vitna við.

Ég var ekki sú eina sem lenti í pissurum þessa helgi. Strákur sem er nýkominn heim úr skiptinemadvöl í SuðurAmeríku fékk líka hlandslettu yfir sig. Það rennir stoðum undir þá kenningu mína að þetta sé ekki einangrað tilvik eða tilviljun heldur nýmóðins árásartækni og niðurlægingaraðferð sem af einhverri ástæðu þykir töff. Reyndar var skiptineminn líka einn af þeim sem stóðu bakvið óvin minn og hvöttu hann áfram á meðan hann pissaði í glas og henti í mig.

Ég hef íhugað ýmsar aðrar ástæður fyrir öllu pissinu heldur en Snoop. Vegna þess að ég var ekki sú eina sem lenti í þessu getur karakter minn ekki einn og sér hafa valdið þessu, þó ég sé auðvitað pirrandi og leiðinleg með eindæmum. Ég velti fyrir mér tengslum við strákinn sem lenti líka í þessu. Við höfum bæði verið skiptinemar á vegum AFS, er það ástæðan? Ég verð að útiloka það vegna þess að það eru fjölmargir aðrir sem voru viðstaddir sem hafa verið skiptinemar á vegum AFS.

Væntanlega voru mennirnir að hefna sín á mér enda ég búin að móðga þá töluvert um kvöldið en ég veit ekki með strákinn, held að hann hafi ekkert gert. Jú, hann hvatti strákana til að kasta á mig pissi. En þar sem þeir tóku sjálfir þátt í því geta þeir varla borið svo sterkar taugar til mín að þeir hefndu sín á honum.

Snoop kemur einn til greina þegar ég er vandlega búin að fara yfir alla kosti, enda getur ekki verið að neitt sem mér dettur ekki í hug komi til greina. Ég lít svo á að hugmyndaflug mitt sé einmitt tæmandi listi yfir alla möguleika.

Nú vilja sumir meina að það sé óþarfi að ásaka Snoop fyrir að draga djöfulinn með sér til Íslands frá rappheimum. Að það hlusti enginn á hann hvort eð er. Fyrir síðustu helgi hafði ég sjálf enga tröllatrú á að koma mannsins hefði nokkur áhrif. Nú finnst mér atvikið um helgina benda sterklega til þess að raunin sé önnur.

Getur það virkilega verið tilviljun að sömu helgi, reyndar sama dag, og frægur pissari kemur til landsins er pissað yfir mig? Og það í fyrsta og eina skiptið hingað til. Ég kaupi það ekki.

Mér dettur helst í hug að þetta sé einhver bylgja sem gengur yfir borgina. Ég vona þá að hún gangi fljótt yfir og komist úr tísku þegar Snoop tekur saman föggur sínar og yfirgefur svæðið.

Ugla Egilsdóttir. Lesið upp á Talstöðinni 18. júlí.

Ræða Kristínar Tómasdóttur 22 ára nema á Þingvöllum 19. júní 2005

Kæru konur, ég óska ykkur innilega til hamingju með daginn.

Það er mér sannur heiður að ávarpa ykkur í dag. 90 ár eru liðin frá því við fengum kosningarétt og í ár fögnum við líka ýmsum öðrum mikilvægum áföngum sem náðst hafa í réttundabaráttu kvenna undanfarna áratugi. Áföngum sem hafa haft áhrif á okkur allar.

Barátta kvenna á Íslandi fyrir réttindum sínum hefur verið löng og ströng ferð. Mörg mikilvæg skref áfram en líka all nokkur afturábak. Íslenskar konur eiga formæðrum sínum margt að þakka og á herðum okkar hvílir sú ábyrgð að halda þessari baráttu áfram. Eftir alla orkuna, vinnuna, fórnirnar og niðurlæginguna sem konur fyrr og síðar hafa gengið í gegnum, skammast ég mín fyrir það að við skulum vera að fagna sjálfsögðum mannréttindum og að enn þurfum við að sýna samstöðu og berjast fyrir réttindum okkar.

Það gleður mig þó að sjá okkur svo margar hér í dag, enda er lykillinn að velsemd og réttindum kvenna samstaða og hún sést aldrei betur en á stundum sem þessari.

Það er árið 2005. Ég er í háskóla – takk , ég er í vinnu – takk, ég er með kosningarétt – takk, ég get stjórnað barneignum mínu – takk, ég get gift mig og skilið eftir hentisemi – frábært, ég get tekið lán og ég get stjórnað eigin fjárhag- takk fyrir það! Þetta þakka ég, formæðrum mínum á borð við Ingibjörgu H. Bjarnason, Bríeti Bjarnhéðinsdóttur, Ingu Láru Lárusdóttur, Björgu Thorarensen og öðrum sem ruddu brautina. Ég þakka rauðsokkunum, kvennalistakonum, kvennréttindafélögum og öðrum baráttukonum.

Ég á það samt á hættu að mér verði nauðgað. Ég á það samt á hættu að fá minni laun en kollegi minn af gagnstæðu kyni, ég á það samt á hættu að vera ekki metin að verðleikum sökum kynferðis míns, ég á það samt á hættu að komast ekki inn á þing af sömu ástæðu, ég á það samt á hættu að fá ekki vinnu vegna þess að ég get orðið ólétt, ég á það samt á hættu að verða fyrir kynbundnu ofbeldi í ýmsum myndum. Ég er í mun meiri hættu en karlmenn í svipaðri stöðu og ég.

Ef ég verð þeirrar gæfu aðnjótandi að eignast dóttur í framtíðinni er það mín ósk að hún standi hér í framtíðinni og þakki okkur sem hér stöndum í dag fyrir það að hún eigi það ekki á hættu að henni sé nauðgað, að hún eigi það ekki á hættu að fá lægri laun en kollegar hennar af gagnstæðu kyni og að hún eigi það ekki á hættu að henni sé mismunað eftir kynferði á nokkurn hátt.

Ég skal vera alveg hreinskilin. Stundum er ég orðin dauð þreytt á þessari baráttu. Stundum er ég vonlaus og alveg að gefast upp. ÉG ER 22 ÁRA GÖMUL! HALLÓ! Allstaðar mæti ég fordómum, óþolinmæði, litlu umburðarlyndi og kaldhæðni. Það mætti stundum halda að ég væri eini feministinn innan Háskóla Íslands því ég er fræg fyrir það og oftar en ekki litin hornauga. Þeim mun fleiri hornaugu því lengur verð ég með lægri laun en kollegar mínir af gagnstæðu kyni. Ég veit samt að það þýðir ekki neitt að vera vonlaus og viti MENN ég er rétt að byrja. Ég er full af eldmóði og ákveðin í því að nú þarf bara að sigrast á því sem eftir er.

Og hvað get ég gert? Ég get hvatt alla sem í kringum mig standa til þess að taka höndum saman og átta sig á alvarleika málsins. Þessu þjóðfélagi get ég ekki breytt ein og ekki getum “bara við” sem erum meðvituð um ástandið breytt því saman. Þetta ástand breytist aðeins ef við tökum okkur öll á. Laungreiðendur verða að binda enda á launamuninn, yfirmenn verða að ráða meðvitað í stjórnunarstöður með tilliti til kyns, karlar verða að hætta að nauðga og auglýsendur verða að vera meðvitaðir um afleiðingar þess að hver auglýsingin á fætur annarri er með allsberri konu langt undir kjörþyngd.

Á Íslandi sem í öðrum löndum viðgengst klám, vændi og ofbeldi. Að útrýma slíkri hegðun ætti að vera forgangsatriði hjá öllum, hvar sem er í heiminum.

Að meðaltali hefur fjórða hver kona á Íslandi verið beitt kynbundnu ofbeldi, klámmarkaðurinn stækkandi fer og mansal veltir álíka peningum og ólögleg sala á vopnum og eiturlyfjum.

Ég ansa því ekki að við getum ekki breytt þessu, að við ráðum ekki við internetið og hvað aðrir gera á bak við luktar dyr. Ég ansa ekki sögum af hinni hamingjusömu vændiskonu og að lagasetningar geri bara illt verra! Við breytum engu með þessu hugarfari. Ég veit að við getum breytt þessu, komið í veg fyrir nauðganir, sifjaspell, klám, áreitni og launamun. Við verðum að standa saman, fræðast og finna lausnir!!

Kona hefur aldrei verið forsætisráðherra, utanríkisráðherra, biskup eða bankastjóri á Íslandi. Eins og ég sagði áðan þá er árið 2005, hvernig í ósköpunum stendur á þessu?
Í 100 stærstu fyrirtækjunum á Íslandi eru 96 karlar og 4 konur sem gegna æðstu stjórnunarstöðum.
Ráðherrar eru 9 karlar og aðeins 3 konur, Þetta er ekki jafnrétti!

Það er liðinn allt of langur tími síðan konur brutust til mennta og út á vinnumarkaðinn og þar af leiðir að frasinn um að jafnréttið geti tekið tíma er orðin ansi úreltur. Þetta eru staðreyndir sem við eigum ekki að sætta okkur við, þetta eru staðreyndir sem staðfesta það að mun erfiðara er fyrir konur að komast upp þjóðfélagsstigann en karla. Þeir virðast rúlla sér upp rúllustigann. Þetta eru staðreyndir sem benda til þess að við verðum að halda áfram til að ná raunverulegu jafnrétti og ekki láta þagga niður í okkur með einhverju smáræði.

Konum hefur á síðustu árum farið fækkandi inni á alþingi.

Konur vilja vera inn á þingi og þingið á að vera aðgengilegt fyrir þær. Afsakanir eins og að konur bjóði sig ekki fram duga mér ekki. Ef beita þarf öðrum leiðum og aðferðum, nú gerum það þá. Konur eru helmingur þessarar þjóðar og eiga að hafa aðgang að helmingi valda í þessu samfélegi. Lýðræðið á að endurspegla lýðinn.

Vændisfrumvarpið hefur enn ekki komist í gegnum allsherjarnefnd en um fá mál hefur skapast breiðari samstaða meðal kvenna þvert á flokka og samtök. Nú síðast varð uppi fótur og fit þegar taka átti á fyrningarfresti í kynferðisafbrotum gegn börnum. Þetta er skammarlegt. Þetta eru málin sem á að afgreiða á undan öllum öðrum.

Þegar lagt var fram frumvarp um sölu símans var alþingissalurinn full setinn af áhugasömum alþingismönnum sem var virkilega annt um þetta málefni. Þegar lagt var fram frumvarp um að fjarlægja ofbeldismenn af heimilum sínum mættu 2!!! 2!!! HALLÓ...

Til þess að stöðva vændi og klám verðum við öll að láta okkur þessi mál varða. Þingmenn óháð flokkum, alþýðan óháð kyni, rannsóknarmenn óháð fagi, fjölmiðlar og svona mætti lengi telja.

Launamunur á atvinnumarkaði hagfræði og viðskipta menntaðra hefur aukist úr 6,8% í 7,9% frá því árið 2003.

Þessar tölur benda til þess að okkur er að fara aftur. Jafnréttisumræðan er að opnast, en launamunurinn eykst. HALLÓ? Atvinnuval eða að konur biðji ekki um launahækkun eru aukaatriði í þessari umræðu. Þessi ábyrgð er alfarið í höndum laungreiðenda hvort sem þeir eru á kvennavinnustöðum, karlavinnustöðum eða blönduðum vinnustöðum. Það sem gleymist svo oft er að karlavinnustaðir borga mun betur en kvennavinnustaðir. Sjálf hef ég unnið bæði í byggingavinnu og á leikskóla og velti því fyrir mér hvaðan frasinn um erfiðisvinnu kemur!

Frá 5 ára aldri velja börn sér leikfélaga eftir kyni og leikir þeirra fara að einkennast af þeim kynhlutverkum sem samfélagið samþykkir. Þetta leiðir svo af sér afar kynskipt atvinnulíf. 75% vinnandi fólks vinnur annað hvort á karla eða kvenna vinnustöðum. Eitt af því sem við þurfum að gera er að vera meðvituð um uppeldi barnanna okkar.

Í sambandi við launamuninn verð ég að fá að hrósa Runólfi Ágústssyni rektor háskólans á Bifröst fyrir ræðu sína við útskrift núna í vor. Þar fjallaði hann um launamun útskrifaðra viðskiptafræðinga og hitti naglann á höfuðið. Hann er í lykilstöðu til þess að hafa áhrif á launamuninn og hvet ég hann til þess að tileinka sér frekari kynjafræðikennslu í framtíðinni. Kynjafræði er lykillinn að hugarfarsbreytingu og hugarfarsbreyting er lykillinn að jafnréttinu.

Kröfur til karla og kvenna verða sífellt óraunhæfari. Konur eiga að vera grennri og karlar eiga að vera harðari. Staðalímyndir stjórna samfélagi okkar og öll erum við dæmd eftir þeim. Þegar klámmyndbönd eru afþreyingarefni unglinga, landlæknir hefur áhyggjur af óheilbrigðu kynlífi þeirra og átraskanir eru orðnar hluti af okkar daglega lífi þá hljótum við að spyrja okkur hvort staðalímyndir nútímans séu að gera okkur gott!


Ég horfði á útför Jóhannesar Páls páfa og ég grét. Ekki vegna þess hve sárt ég saknaði hans. Heldur vegna þess að allir valdamestu menn heimsins sáu ástæðu til þess að leggja til hliðar ágreiningsmál sín og héldu til Rómar til þess að votta honum og málstað hans virðingu sína. Þarna var feðraveldið ljóslifandi. Varla konu að sjá. Kaþólska kirkjan er á móti fóstureyðingum og samkynhneigð og Benedikt 16 fullyrðir að konur séu hið óæðra kyn. Þessum skoðunum heldur hann á lofti og margar milljónir manna lofsyngja hann. Ég minni enn og aftur á árið 2005 og HALLÓ... hvert í ósköpunum stefnir þetta?

Ég nefni þetta sem dæmi um æðsta valdið og að við þurfum að hafa áhrif á það til þess að geta nálgast takmark okkar. Hættum að tala okkar á milli. Tölum við Páfann, Bush og valdhafa þessa lands.

Æðstu embætti dómsvalds, löggjafarvalds og framkvæmdavalds á Íslandi eru 84. Þegar þau eru skoðuð með kynjagleraugum kemur í ljós að þeim gegna 60 karlar og 24 konur. Við verðum að skapa sameiginlegan skilning bæði kvenna og karla á því að við þurfum að vera í sama liði. Það er okkur öllum fyrir bestu. Án þátttöku og skilnings karla á jafnréttisbaráttu komumst við ekki langt. Við þurfum fleiri og fjölmennari hópa karla sem skilja mikilvægi jafnréttis umræðunnar, fleiri sem taka sér karlahóp Feministafélagsins til fyrirmyndar. Þetta er eitt af mörgum og mikilvægum verkefnum okkar.

Ágæta samkoma,
Ég er sannfærð um að trúin á betri heim fleytir okkur áfram í þessum efnum. Trúin á það að við getum breytt einhverju, að við getum haft áhrif á umhverfi okkar í einu og öllu.

Ég trúi því og ÆTLA AÐ HALDA ÁFRAM og hvet ykkur, konur og karla til þess að standa með mér í því.

NEI, ráðum ekki stráka!

Fyrir ekki alls löngu sótti drengur um starf í bakaríi í heimahverfi sínu. Drengur þessi er ábyrgur, er formaður nemendaráðs í skólanum sínum og góður námsmaður. Honum að vísu synjað um starfið á þeim forsendum að hann væri strákur og því leyndi yfirmaður bakarísins ekki. Rökstuðningurinn var af skornum skammti, í sjálfu sér ekki neinn.
-Strákar eru líka beittir óréttlæti sökum kynferði síns enda er langt í land hvað jafnréttisbaráttu varðar. Árið 2005 fá konur í Sádi Arabíu og víðar hvorki kosningarétt né bílpróf, launamunur kynjanna er vítaverður, karlar fá sjaldan forræði yfir börnum sínum og strákar fá ekki vinnu í bakaríum. Lengi mætti áfram telja en ég læt það "ósagt"(skrifað) að sinni.



Brynja, dóttir Halldórs og Hildar

Erlent | mbl.is | 18.5.2005 | 22:18
Bandaríska þingið íhugar að banna kvenkyns hermönnum að koma nálægt átökum

Repúblikanar á Bandaríkjaþingi eru að reyna að fá samþykkt frumvarp sem bannar að konur í hernum komi nálægt átökum. Frumvarpið er nú fyrir þingnefnd sem fjallar um hermál, að því er fram kemur á fréttavef BBC.

Flutningsmenn tillögunnar vilja að konum verði ekki lengur leyft að vinna sem bílstjórar, læknar og skipulagssérfræðingar í sveitum sem veita bardagasveitum aðstoð. Segja þeir að konur séu í þessum sveitum séu of nálægt átökunum. Konum í bandaríska hernum er bannað að vera í fremstu víglínu.

Bandaríski herinn er hins vegar andvígur tillögunni enda er erfitt að fá fólk til að ganga í herinn. Segja yfirmenn í hernum að ef frumvarpið verði að lögum verði þeir að flytja 22.000 konur úr starfi og fá karla í staðinn.

Í Írak eru átökin fyrst og fremst við uppreisnarmenn sem þýðir að þar er engin ákveðin fremsta víglína. Um 9.000 konur eru í bandaríska hernum í Írak og hafa 35 látið lífið þar. Átök geta orðið hvar sem er og hvenær sem er og konur hafa oftsinnis lent í bardaga.

Repúblikanar í þinginu vilja nú að konum verði bannað að vera í svokölluðum stuðningssveitum bardagasveita en herinn er því mjög andsnúinn. Mjög erfitt hefur reynst að fá nýtt fólk til að ganga í herinn að undanförnu og á síðustu þremur mánuðum vantar 15% upp á að herinn nái settum markmiðum um nýliðun. Verði frekari hömlur settar á hlutverk kvenna í hernum verður enn erfiðara að manna sveitir hersins.

Nadira

Sýknaður af broti gegn systurdóttur

Héraðsdómur Norðurlands vestra klofnaði í máli manns sem saknaður var um kynferðisbrot gegn systurdóttur sinni. Tveir dómarar sýknuðu manninn, en sá þriðji skilaði af sér séráliti og vildi dæma hann í tíu mánaða fangelsi.

Maður hefur verið sýknaður af ákæru um að hafa misnotað tíu ára gamla systurdóttur sína. Einn dómari skilaði af sér séráliti og vildi dæma manninn í tíu mánaða fangelsi auka þess að láta hann greiða stúlkunni hálfa milljón í miskabætur.
Maðurinn sem var sakaður um að hafa káfað innan klæða á rassi og kynfærum stúlkunnar, sett fingur inn í kynfæri hennar og nuddað lim sínum við ber kynfæri hennar og rass. Stúlkan var í heimsókn hjá manninum og sjö ára gamalli dóttur hans og sváfu þau öll í sama rúmi. Stúlkan bar að maðurinn hefði talið hana sofandi en hún lét ekki vita af því að hún vakti og greindi frá því hvernig hann hefði að lokum farið og þvegið sér. Þegar hún taldi að maðurinn væri sofnaður sagðist hún hafa fært sig niður á gólf og var hún þar sem eftir lifði nætur.
Meint brot átti að hafa átt sér stað í júní 2003. Dómurinn var kveðinn upp í Héraðsdómi Norðurlands vestra 6. þessa mánaðar af Halldóri Halldórssyni dómsformanni og Ásgeiri Magnússyni, héraðsdómurum. Sigrún Guðmundsdóttir héraðsdómari skilaði séráliti.
Maðurinn neitaði staðfastlega sakargiftum og kvaðst enga skýringu geta gefið á því hvers vegna stúlkan sakaði hann um að hafa brotið á sér. Stúlkan var tvisvar fengin til að tjá sig um atburðina fyrir dómi en vildi í fyrra skiptið ekki tjá sig. Í millitíðinni var tekið viðtal við stúlkuna í Barnahúsi þar sem hún greindi starfsmanni þar frá atburðum. Meirihluti dómsins tekur fram að þessir annmarkar á framburði stúlkunnar gegn staðfestri neitun mannsins þýði að ekki hafi tekist að "færa fram lögfulla sönnun á sekt hans"
Í sérákvæði Sigrúnar bendi hún á að ágreiningslaust sé að stúlkan hafi dvalist nætulangt hjá manninum á umræddum tíma, hún hafi greint bæði bróður sínum og móður frá atburðunum en það gerði hún rúmum mánuði eftir að meint brot átti sér stað. "Þótt stelpan hafi ekki skýrt ókunnugum frá atburðinum strax, álít ég hana trúverðuga og einlæga í framburði sínum" sagði hún og vísaði jafnframt til álits lækna um að meyjarhaft stúlkunnar hafi borið gróna áverka og hún hafi sýnt merki um slæma andlega líðan eftir atburðinn, svo sem svefntruflanir og sjálfsmeiðingar.
Sigríður J. Friðjónsdóttir saksóknari segir að enn hafi ekki verið tekin ákvörðun um hvort dómnum verði áfrýjað en hann hafi verið sendur áfram til ríkissaksóknara.

Þessi grein kom í Fréttablaðinu í morgun en fær enga athygli á sjónvarpsskjánum. Ef til vill verður eitthvað um þetta mál rætt þegar ríkissaksóknari hefur tjáð sig um málið. Gáleysi norðlensku dómaranna tveggja er vítavert og til háborinnar skammar. Jafnframt lýsi ég yfir ánægju hvað framgöngu þriðja dómarans varðar. Vil gjarnan skapa umræður meðan á próflestrinum stendur.

Brynja B. Halldórs-og Hildar.

1. maí gangan...

...verður farin frá Skólavörðuholti á sunnudaginn. Safnast verður saman fyrir utan Hallgrímskirkju kl. 13:00 en gangan hefst kl. 13:30 og gengið er niður á Ingólfstorg þar sem útifundur hefst kl. 14:10.

Allir að mæta í bleiku!
Steinunn G.G.

Fjölmennum í 1. maí gönguna!

Á sunnudaginn er verkalýðsdagurinn og þá fer fólk í kröfugöngu. Femínistafélagið fer nú í þriðja sinn í kröfugönguna, en ég var með fyrir tveimur árum og þá var ótrúlega gaman, mikil stemmning. Allir að mæta í bleikum bolum og hugmyndin er einnig sú að mæta í rauðum sokkum til að heiðra rauðsokkurnar. En í ár eru 35 ár síðan þær tóku þátt í sinni fyrstu 1. maí göngu og með þeim var stór stytta af Lýsiströtu sem var með borða um sig miðja þar sem stóð: Manneskja ekki markaðsvara. Þetta slagorð á enn vel við í dag í heimi klámvæðingar og mansals, því miður. Allir að mæta með kröfuspjöld! Látið heyra hvað þið viljið! Eða bara mæta með ykkur sjálf og baráttuandann!

Áfram femínistar!
Steinunn

Ps. Set inn nánari upplýsingar um stað og tíma þegar ég hef komist að því.

Kvennaframboð?

Hér fer stutt óútpæld pæling sem kviknaði í próflestri

Ég var að hugsa um kvennaframboð. Það eru alltaf hugmyndir á kreiki um nýtt kvennaframboð líkt og Kvennalistinn forðum daga og nýja feminíska framboðið í Svíþjóð. Konur spyrja sig hvort það sé virkilega eina leiðin til þess að koma konum að í stjórnmálaflokki og hinu háa Alþingi.

Ég veit ekki svarið en pælingin er þessi:
Ef ég ætlaði að stofna kvennaframboð með kyn- og skoðanasystrum mínum í Femínistafélaginu finndist mér ótækt að skilja strákana eftir út undan. Það er kannski ekki í anda rauðsokkanna en það er tvímælalaust andi FÍ. Strákarnir eru með. Þeir standa ekki verr hvað varðar hugsjón í verki og væru sumir úrvals feminískir þingmenn.

Þá fór ég að hugsa, er það það sem skiptir máli eða er það kynferðið?

Við vitum núna að það er vitagagnslaust fyrir jafnréttisbaráttuna að hafa konur í háum embættum ef þær spila svo bara sama leik og aðrir. Þá er betra að hafa karl með jafnréttishugsjón. Er þá langbest að hafa fullt af jafnréttissinnuðum konum?
Kona á Alþingi með jafnréttishugsjón er fyrirmynd fyrir aðrar konur, en það gerir jafnréttissinnaður karl líka fyrir karla. Og öfugt og í kross.

Ég kemst ekki að niðurstöðu en ég er mjög hrifin af þeirri hugmynda að strákarnir og karlarnir séu með. Hvort það sé best, veit ég ekki.

Eva Bjarnadóttir

Var að lesa Fréttablaðið rétt í þessu. Rakst þar á þessa frétt: (skrifa hana orðrétt upp)

Einokun áfram á klámblöðum

"Ritfanga- og skrifstofuverslunin Office 1 hóf í vikunni sjálfstæðan innflutning á erlendum tímaritum í samkeppni við Pennann-blaðadreifingu og býður þekkt tímarit á lægra verði en áður hefur þekkst á Íslandi. Sem dæmi má nefna að Cosmopolitan UK mun kosta 495 krónur hjá Office1 en kostar annars staðar yfir 1000 krónur.
Penninn-blaðadreifing hefur setið einn að tímaritamarkaðnum en Fjölvar Darri Rafnsson, framkvæmdastjóri hjá Office 1, segir verðlækkunina hafa vakið mikla athygli og það sé á köflum örtröð í verslununum þar sem fólk kaupi heilu blaðabunkana. Þeðal titla sem þegar fást á lágu verði eru GQ, Esquire, Now,Vogue, OK og Empire.
Klámblöðin sem verma efstu hillur bókaverslana eru ekki þarna á meðal. "Við eru ekki farnir að kaupa inn klámblöð og selja á lækkuðu verði" segir Darri sem útilokar þó ekki að karlablöðin Hustler, Cheri og fleiri verði einhvern tíma í blaðarekkum Office 1 á niðursettu verði.
Hann telur víst að eftirspurnin eftir klámblöðum sé umtalsverð. "Ég hef fengið mikið af fyrirspurnum um þetta og það hefur mikið verið hringt og spurt hvort við komum til með að selja klámblöð á lægra verði. Þetta eru allt karlmenn sem hafa hringt og áhuginn er greinilega umtalsverður . Við höfum ekki ákveðið neitt í þessum efnum og klámblöðin eru ekki á leiðinni inn hjá okkur en ég hefekki lokað á neitt. Ég get vel hugsað mér að taka klámblöðin inn en það strandar á svolítið á innkaupastjóranum mínum sem er kona vill alls ekki kaupa þessi blöð"

Já, hví ekki að selja mannslíkamann enn ódýrar? Þetta segir okkur að einungis áhugasamir hafa haft samband við Office1. Ég hvet til aðgerða til að sporna við mögulegri sölu Office 1 á klámblöðum.

Brynja Halldórsd.(og Hildard.)

Vel heppnað hitt!

Skemmtilegar umræður spunnust um stráka og stelpur í nemendastjórnum framhaldsskólanna á fjórða ungliðahitti vetrarins. Jakob, forseti nemendafélags MH talaði um kynjahlutfall í stjórnum MH síðastliðin ár og taldi það vera jöfn staða kynjanna í aðalstjórn en annað mætti segja um Lagningadagnefnd og því um líkt. Kristín Svava, formaður nemendafélags Kvennó talaði um reynslu sína af félagslífinu í skólanum en hún hefur tekið þátt í Morfís, Gettu betur og uppistandskeppnum ásamt því að vera formaður félagsins.


Það sem stóð upp úr í umræðum var að stelpur eru hræddari við mistök en strákar. Það vantar kvenímyndir og hvatningu í samfélaginu t.d. í pólítík og stjórnunarstöðum almennt. Það sem var einnig uppi á teningnum var að stelpur eru ekki nógu duglegar að hvetja stelpur, þær fá að heyra frá öðrum stelpum "Þú getur ekki farið í þetta, það eru bara strákar sem gera þessa hluti." Allir voru sammála um að það þyrfti að hvetja stelpur og stráka til að fara í þær nefndir sem þau vilja fara í, bara gera allt nógu áhugvert fyrir bæði kynin. Til dæmis að auglýsinganefnd getur verið góður vettvangur fyrir þá sem hafa áhuga á grafískri hönnun ef það er prómóterað á þann hátt.

Kvöldið var því í alla staði vel heppnað og deginum ljósara að umræðan um völd og framhaldsskóla á vel heima í Ungliðahópi FÍ. Strákar og stelpur þurfa meðvitað að brjóta niður veggi vana og hefðar og þora!

Til að gefa nasasjón af því sem gæti verið til umræðu á gleðikvöldinu næstkomandi þriðjudag hef ég sett inn þessar upplýsingar hér að neðan. Þetta eru upplýsingar sem ég og Svenni höfum safnað síðastliðinn mánuð hjá framhaldsskólum á Íslandi, enn vantar nokkra skóla því miður en ég held að þetta gefi nokkuð raunsæja mynd í heildina. Það hefði verið gaman að hafa líka lista yfir ritara, gjaldkera og aðra stjórnarmeðlimi í nemendafélögum framhaldsskóla en það var of mikil vinna að safna því í þetta skiptið... kannski kemur það seinna ;o)

Formenn nemendafélaga framhaldsskóla á Íslandi

Flensb. 1974-2005 Strákar: 25 Stelpur: 6
MR 1879-2005 Strákar: 110 Stelpur: 8 (1. stelpa 1974)
ME 1979-2005 Strákar: 24 Stelpur: 8
VÍ 1967-2005 Strákar: 37 Stelpur: 1
MS 1970-2004 Strákar: 30 Stelpur: 4
ML 1952-2001 Strákar: 44 Stelpur: 5
MH 1966-2005 Strákar: 31 Stelpur: 7
FG 1984-2004 Strákar: 16 Stelpur: 3
FÍV 1985-2005 Strákar: 16 Stelpur: 4
FSU 1993-2005 Strákar: 5 Stelpur: 5
FB 1975-2005 Strákar: 24 Stelpur: 6 (5 stelpur á síð. 6 árum!)
FSN 2005 Strákar: 1 (fyrsta starfsár skólans)
FÁ Upplýsingar ekki til en kennari þar til 14 ára man eftir einni stelpu
FVA Upplýsingar ekki til, en kennari segir langtum fleiri stráka hafa verið fors.
VM Aust. Ekki upplýsingar um ártöl en þar hefur aldrei stelpa gegnt formennsku


Steinunn

Hver hefur völdin í þínum skóla?
-Þriðja gleðikvöld ungliðahóps
Femínistafélags Íslands-

Í Hinu húsinu
12. apríl 2005 Kl. 20:00

Kristín Svava Tómasdóttir
-Formaður nemendafélags Kvennó-
og
Jakob Tómas Bullerjahn
-Formaður nemendafélags MH-

Velta fyrir sér kynjahlutföllum í félagsstarfi framhaldsskóla

Af hverju eru svona fáar stelpur í Gettu betur??? Af hverju eru svona fáir strákar í skreytinganefnd??? Eru stelpur með of skræka rödd fyrir MorfÍs??? Vilja stelpur ekki gefa sér tíma til að vera formenn nemendafélags??? Skiptir einhverju máli að hafa jafn marga stráka og stelpur í stjórn nemendafélagsins í þínum skóla??????

Ókeypis inn og allir velkomnir!

Rjúfum þögnina

Ég vek athygli ykkar á framtakinu Rjúfum þögnina sem Blátt áfram og STYRKUR standa fyrir en er stutt af UNIFEM á Íslandi og fleiri aðilum.

Rjúfum þögnina á Arnarhóli 9 apríl klukkan 14:00

Við þekkjum of mörg einhvern sem hefur lifað af ofbeldi. Sum okkar betur en aðrir.

Við bjóðum þér að sýna samstöðu, sýna í verki að við tökum ekki lengur þátt í samsæri þagnarinnar. Ofbeldi þrífst í þögninni.

Komdu á Arnarhól með þinn bol, með eða án texta - við sköffum snúru og klemmur! Við verðum líka með boli til sölu fyrir 1000 kr ef þið viljið styrkja málstaðinn.

Við hengjum upp bol fyrir okkur sjálf sem höfum lifað af ofbeldi og ef þú þekkir einhvern sem hefur lifað af ofbeldi getur þú hengt upp boli fyrir hann/hana. Ef þú vilt segja frá einhverju sem varðar ofbeldi, lesa ljóð eða stutta sögu, eða bara nafnið þitt til þess að rjúfa þögnina þá verður það í boði. Við styðjum þig í að gera það sem þú þarft til þess að rjúfa þögnina þína.

Sýnum ábyrg viðbrögð við öllu ofbeldi - Þú átt valið - Okkar val, Rjúfum þögnina!
Skipuleggjendur eru STYRKUR - úr hlekkjum til frelsis og verkefnið BLÁTT ÁFRAM.

Framtakið styðja Samtök um Kvennaathvarf, Stígamót, Kjarkur á Akureyri, UNIFEM á Íslandi, Íslandsdeild Amnesty International, V-Dagurinn og Femínistafélag Íslands.

Kveðja Nadira

Það gerist hægt en það mjakast

Það gæti meira en lítið verið að strákarnir/mennirnir séu að verða virkari í barnauppeldinu sem er mikið fagnaðarefni. Um daginn sá ég tvo unga menn, starfsmenn á leikskóla með hóp barna í eftirdragi. Einnig var ungur maður með barnið sitt í barnavöruverslun að ræða barnavagna við karlkynsstarfsmann þar.Sífellt fleiri menn taka barnaeignaleyfi og Félag ábyrgra feðra er afar virkt.
Mér hefur alltaf þótt það út í hött að segja að konur séu hæfari uppalendur en karlmenn.
Margir mótmæla kynjakvóta, mín skoðun er sú að ef tveir jafnhæfir einstaklingar af mismunandi kyni eða kynþætti sækja um sama starfið ætti að taka inn þann einstakling sem er í minnihluta á þeim vettvangi. Þ.e.a.s. í stað þess að kasta peningi eða draga spil er gott að beita þessari aðferð til að jafna út hlutföllin. Þetta gildir um karla sem konur,svarta sem hvíta, græna sem bláa.(Sjá jafnréttislög)

Brynja Halldórsdóttir

Rektorskjör í Háskóla Íslands

Í síðustu viku var Kristín Ingólfsdóttir prófessor kosin rektor í Háskóla Íslands. Hún hafði meira fylgi bæði stúdenta og akademískra starfsmanna en mótherji sinn. Eins og alltaf þegar konur eru annars vegar var kynferði hennar mikið til umræðu. Athugasemdir eins og "það má ekki kjósa hana bara af því að hún er kona!" heyrðust víða. Þrátt fyrir að Kristín sé með sambærilega menntun og reynslu og karlarnir þrír sem buðu fram á móti henni í fyrri umferð og karlinn sem bauð fram á móti henni í seinni umferð var kynferði hennar umtalsefni. Það hafði enginn áhyggju af því að karlinn yrði valinn vegna kyns síns ...enda svo ansi vel reyndur og menntaður.

Þarna er komið við kjarna málflutnings femínista. Það að kona sé kona er umtalsefni. Rétt eins og um aðrar breytur út fyrir "normið", kynþáttur, kynhneigð o.s.frv. Það að karl er karl skiptir engu máli ...þegar verið er að tala um valdastöður.

Það verður ekki jafnrétti fyrr en kyn skiptir ekki lengur máli þegar velja á fólk í valdastöður eða aðrar stöður sem við í dag tengjum við ákveðið kyn.

Eva Bjarnadóttir

Þann 31.mars er umsóknarfrestur fyrir skapandi sumarhópa í Hinu húsinu. Allir sem vilja vinna í sumar við e-ð listrænt, skapandi og fræðandi geta sótt um styrk.
Ég er með hugmynd að hóp sem gæti unnið í sumar. Þá er ég að tala um unga femínista sem færu með ljóð út á götu, kannski gjörninga, fræðslu um femínisma o.fl. og mig langar einnig að setja upp Píkusögur, fá leikstjóra og hafa nokkrar sýningar og einnig styrktarsýningu fyrir Stígamót eða e-ð. Við erum komnar tvær í hópinn en vantar fleiri. Því fleiri, því betra og skemmtilegra. Svo ef einhver hefur áhuga verið endilega í bandi sem fyrst svo hægt sé að sækja um styrk og látið þetta berast.
Kveðja Nadira

Hér er brandari sem mér finnst soldið skondinn, hvað finnst ykkur?

A French teacher was explaining to her class that in French, unlike English, nouns are designated as either masculine or feminine.

"House" for instance, is feminine -- "la maison." "Pencil" , however, is masculine -- "le crayon."

A student asked, "What gender is 'computer'?" Instead of giving the answer, the teacher split the class into two groups, male and female,and asked them to decide for themselves whether "computer" should be a masculine or a feminine noun.

Each group was asked to give four reasons for their recommendation.

The men's group decided that "computer" should definitely be of the feminine gender ("la computer"), because:

1. no one but their creator understands their internal logic;

2. the native language they use to communicate with other computers is incomprehensible to everyone else;

3. even the smallest mistakes are stored in long term memory for possible later retrieval; and

4. as soon as you make a commitment to one, you find yourself spending half your pay check on accessories for it.

The women's group, however, concluded that computers should be Masculine (le computer"), because:

1. in order to do anything with them, you have to turn them on;

2. they have a lot of data but still can't think for themselves;

3. they are supposed to help you solve problems, but half the time they ARE the problem; and

4. as soon as you commit to one, you realize that if you had waited a little longer, you could have gotten a better model.

The women won.

Nadira

Feminists Unitedkitty 

Fann gullkorn í Skinfaxa, fannst ég verða að koma því fyrir í ljósi umræðunnar í kringum sjónvarpsþáttinn The Swan:

Tilbúin fegurð

Þú getur gifst konu
sem læknar hafa breytt

Þú getur gifst konu
sem fyrir fegurð sína hefur greitt

En mundu.....
ósnert er hennar rót
börnin ykkar verða ljót
(Henrik Geir Garcia)

Mér stökk bros þegar ég sá þetta. Sjálf mundi ég aldrei gangast undir fegrunaraðgerð og tæki því mjög illa tæki einhver nákominn mér upp á slíku. Ég er stolt af útliti mínu og gleðst því óspart þegar einhver minnist á það hve lík ég er móður minni. Ég vil að andlit mitt og líkami beri þess merki. Þess vegna hafna ég fegrunaraðgerðum.Einhverjar skoðanir á þessum orðum?

Brynja Halldórsd.

V-DAGUR

Ég vil koma því á framfæri að V-Dagurinn og alþjóðlegi baráttudagur kvenna er í dag. Eve Ensler sem skrifaði Píkusögur er komin til landsins en hún stofnaði V-Dagssamtökin. Í Íslensku Óperunni í kvöld verður mikil dagskrá sem byrjar klukkan 21. Það verður meðal annars lesið einleiki úr Píkusögum en það verða þær Ingibjörg Sólrún, Ilmur og Magga Vilhjálms sem sjá um það. Svo auðvitað tekur hin frábæra Eve Ensler til máls. Það er ókeypis inn og það er örugglega hægt að kaupa svo boli og merki til styrktar samtakanna sem starfa í yfir 35 löndum. Á sunnudagskvöldið var heimildarmynd um Eve Ensler á RÚV sem sýndi för hennar til Afríku þar sem hún stofnaði húsaskjól fyrir ungar stúlkur sem annað hvort flúðu eða var útskúfað af fjölskyldu sinni fyrir að vilja ekki láta umskera sig. V-Dagssamtökin berjast gegn ofbeldi á konum og stúlkum og er þessi dagur í dag til að vekja til umhugsunar um þessi mál. Ég mæli með að þeir sem hafa tíma í dag fari í óperuna og styrkja málefnið, en það er tilvalið að fara eftir fundinn okkar í dag.

Nadira

The Swan

Ég ákvað um daginn að setjast niður og horfa á nýju þáttaröðina á Skjá1, The Swan. Ég meina það hvers konar rugl er þessi þáttur. Í fyrsta lagi er hann bara fyrir konur, í öðru lagi eru konurnar yfirleitt ósköp venjulegar en bara ekki sáttar við sjálfa sig, og í þriðja lagi er svo heil fegurðarsamkeppni í endanum á þáttaröðinni þar sem konurnar sem eru fallegustu svanirnir keppast um titilinn The Swan.

Þátturinn byrjaði á því að tvær konur fengu boð um að taka þátt í þessu prósessi. Þessar konur voru ósköp venjulegar. Að minnsta kosti ef þær voru svona óánægðar hefðu þær bara þurft að fara tvo mánuði í ræktina, nota góðar snyrtivörur og fá sér flotta klippingu eða e-ð. Meira að segja þá voru karlarnir þeirra .jög ánægðir með þær eins og þær voru.

Það voru teknar ,,fyrir myndir,, þar sem þær voru ófarðaðar og í svona ósköp gráum venjulegum nærfötum.

Jæja svo byrjar prósessið, Þær fara á hótel í þrjá mánuði þar sem þeim er bannað að kíkja í spegil svo allir speglar eru teknir. Svo fara þær í fitusog á rassinum, maganum, lærunum fá fyllingu í varir, nefinu er breytt svo voru meira að segja tannaðgerðir. Svo má ekki gleyma einkaþjálfara í ræktinni, ný hárgreiðsla, ný brjóst o.s.frv.

3 mánuðir líða og þá eru þær leiddar in í sal uppstrýlaðar í glæsilegum kvöldkjól, mikið málaðar og með nýja hárgreiðslu og öðruvísi líkama. Svo fá þær loksins að líta á sig í spegli.

Allir segja við "You are so beautiful" og þannig og þeim sjálfum finnst það. Auðvitað líta þær betur út en á ,,fyrir myndinni,, þar sem ekkert meik öp var notað, það getur falið allt.

Svo er gert upp á milli þessara tveggja kvenna sem segjast vera orðnar fallegar og sáttar við sjálfa sig. Ein af þeim fær að keppa um titilinn The Swan en ekki hin. Sem þýðir að konan sem fær ekki að fara í keppnina hlýtur að hugsa með "ok ég er orðin sæt, en ég er samt ekki nógu sæt eftir allt þetta prósess til að taka þátt í keppninni, svo ég hlýt að vera hræðileg" Allavega myndi ég halda að k0nur með svona lítið sjálfsmat hljóta að brotna niður við þessa tilkynningu að þær eru enn bara ekki nógu sætar (hver svo sem ákveður það).

Hvað finnst ykkur um þennan þátt?

Nadira

Klám og klámvæðing

Þriðja gleðikvöld ungliðahóps Femínistafélags Íslands

Þriðjudaginn 22. febrúar 2005

Kl. 20:00

Í Hinu húsinu

-Nýi salurinn í gamla pósthúsinu-

Sóley Stefánsdóttir

-Meðlimur í staðalímyndahópi FÍ-

og

Hjálmar Sigmarsson

-Meðlimur í karlahópi FÍ-

tala um klám og klámvæðingu

Trúbadorinn Þórir spilar og syngur

Umræður og veitingar

www.ungfem.blogspot.com

PoppTíví

Mér finnst að stjórnendur PoppTíví þurfi að fara að taka meiri ábyrgð á því hvað er sýnt þar og sýna smá þroska. Þar eru allan daginn sýnd tónlistarmyndbönd sem eru mörg hver 100% klámvæðing. Myndböndin eru við lög sem innihalda texta á við þennan: “Komdu hórunni þinni á framfæri, ég kem henni í verð, af því ég þarf fjögur sjónvörp og Mercedes Benza, því sex hórur gera melludólg ríkan, ég borga tíkinni ekki neitt”. Þetta er úr laginu P.I.M.P með 50cent sem rappaði í Laugardalshöllinni í sumar. Það eru samt ekki bara myndböndin sem eru glötuð að mínu mati heldur einnig þættirnir og þá aðallega The Man Show og annar þáttur sem mig minnir að heiti Stripperella en hann fjallar um ofurbeib sem er leynilögga.

Ég horfði á The Man Show á mánudaginn og komst að því að hann er niðurlægjandi jafnt fyrir konur og karla. Þátturinn á að vera fyndinn en hann bara er það ekki! Því miður. Þannig að hann er ekkert nema bara niðurlægjandi. Samkvæmt þættinum eiga karlar bara að hafa gaman af því að drekka bjór, horfa á brjóst og íþróttir, stunda tilfinningalaust kynlíf og spila fjárhættuspil. Konur eiga hins vegar að vera lauslátar og til í allt, grannar, með stór brjóst og stinnan rass. Hér fyrir neðan eru nokkur atriði úr þættinum sem styðja þessa greiningu á hvernig konur og karla eigi að vera. Er þetta fyndið???

1. Þáttastjórnendur ræða um hvort ekki sé hægt að finna upp fjarstýringu sem virkar á konurnar þeirra þannig að hægt sé t.d. að ýta á pásu, spóla yfir túr og spóla til baka í upphaf samfara og ýta á repete þar.

2. Innslagið: How to get laid? Eða á íslensku: Hvernig áttu að fá að ríða?
Spurðu hana hvernig dagurinn hennar var
Þóstu hafa einhvern áhuga
Troddu honum inn

3. Spurningar úr sal, áhorfendur spyrja þáttastjórnendur ráða við vandamálum sínum. Ein af þremur spurningum hljómaði svona: Hvað má líða langur tími frá því ég fæ það þangað til ég get kveikt á íþróttarásinni? Svarið var: Hafðu kveikt á íþróttarásinni á meðan þið gerið það.

4. Um miðjan þátt kom langt atriði sem hét: Safn pirrandi kvenna og kom þar augljóslega í ljós hvernig konur eiga ekki að vera. Pirrandi konur eru þessar:

a. Blómasölukonur á veitingastöðum. Karlinn verður að kaupa rós handa konunni sem hann er með á stefnumótinu ef hann vill fá að ríða eftir matinn.

b. Fatafella sem hugsar bara um viðskiptin og setur takmarkanir og reglur eins og bannað að snerta og að borga þyrfti meira ef hún ætti að fara úr öllum fötunum.

c. Mamma. Konan sem leikur móðurina segir að þegar Jimmy fæddist hefði hann verið með svo lítið typpi að hún hefði haldið að hann væri stelpa, þetta var sem gefur að skilja mjög niðurlægjandi fyrir Jimmy. Þá fór mamman að segja hvað Adam hefði nú haft gaman af jazzballet á yngri árum og var mikið hlegið yfir því en það er greinilega það versta sem ungur strákur getur haft að áhugamáli, því dans er auðvitað bara fyrir stelpur og homma.

d. Stórglæsilegar og ofurfallegar konur sem eru svo með typpi þegar þær fara úr fötunum.

Þetta er ekki skemmtilegt sjónvarpsefni. Sýnið eitthvað annað!

Steinunn Gyðu- og Guðjónsdóttir

Ég vil benda á viðtal við landlækni sem birtist í DV í gær.
Þar koma fram hryllilegar staðreyndir þess efnis m.a. að unglingstúlkur hafi verið þvingaðar til kynferðismaka til þess að komast inn í partý. Landlæknir hvetur femínistia til aðgerða.
Ég veit ekki alveg hversu rétt DV fer með það sem landlæknir hefur sagt, það hlýtur að teljast heiður að kallað sé á okkur til að bjarga þarna næstum heillri kynslóð, sem landlæknir kallar "klámkynslóðina".
En samt er þetta hið furðulegasta mál, við erum líklegasta ein hötuðustu samtök á Íslandi, fáum enga styrki frá hinu opinbera, en samt erum við þau samtök sem landlæknir kallar fyrst á til athafna.
Kjarni málsins hlýtur að vera sá að heimsmynd einhverja einstaklinga innan þessarar kynslóðar er stórlega brengluð. Stúlkum á grunnskólaaldri finnst jafnvel sjálfsagt að þær stundi endaþarmsmök þó svo þær hafi enga ánægju af og segja eins og landlæknir benti á, að þær verði að "venjast þessum fjanda".
Landlæknir segir síðan að femínistar ættu að hugsa meira út í þetta mál en gamla málshætti í dagbókum. Staðreyndin er sú að aðeins hefur verið talað um þessa málshætti á spjallinu á femínistavefnum, sem er auðvitað hið besta mál, einhverstaðar fer þá umræðan fram.
Það sem landlæknir áttar sig e.t.v. ekki á (sem er kannski frekar DV að kenna, ég veit það ekki) er að þetta hangir allt saman á sömu spýtunni.
Ef það þykir bara svaka sniðugt að stærsta prentfyrirtæki á landinu gefi út dagbók fyrir almennan markað með niðurlægjandi málsháttum um konur þá er ekki skrýtið að fólk leyfi sér að hugsa um konur á þennan sama niðurlægjandi hátt. Dropinn holar steininn.
Nú standa kannski einhverjir upp og segja að við höfum engan húmor fyrir þessu en prófum þá bara að snúa dæminu við og í staðinn fyrir að birta þarna einungis niðurlægjandi málshætti um konur, þá væru þarna bara niðurlægjandi málshættir um svart fólk, eða kannski bara rasistabrandarar. Hversu sorglegt væri þetta þá?
Ég held að allir femínistar, opinberir sem óopinberir, láti sig þetta hryllilega mál sem landlæknir talaði um, sig varða, alveg eins og öll önnur mál þar sem ójafnrétti kemur svona sterkt fram...að sjálfsögðu!

Kv.
Bryndís Björgvinsd.

Kvenleg og karlleg gildi...

Nú er ég búin að vera að læra alveg heilmikið í skólanum um tvíhyggju og eðli í tengslum við umræðu um kyn. Um aldamótin 1900 spruttu upp miklar umræður um eðli kynjanna og var þetta mismunandi eðli staðfest með líffræðilegum og læknisfræðilegum rannsóknum hversu réttmætar sem þær nú voru. Samkvæmt þessu voru til dæmis eiginleikar karla: Rökvísi, skynsemi, vitsmunir og réttlæti. Eiginleikar kvenna voru þá: Órökvísi, umhyggja og þær stjórnuðust frekar af tilfinningum og innsæi en vitsmunalegri hugsun. Ekki ætla ég að segja til um hversu mikið eimir enn af þessum eðlis- og tvíhyggjuhugmyndum í dag en þó eru alls kyns hugmyndir ríkjandi um kynin sem enn er verið að reyna að útskýra með tilvísun til líffræðilegra eiginleika. Til dæmis er því í fyrsta lagi haldið fram að konur geti ekki bakkað í stæði og í öðru lagi er það útskýrt með tilvísun til hormóna.

Það að hægt sé að skipta eiginleikum í karllega og kvenlega finnst mér ekki skipta höfuðmáli heldur það að þeir eiginleikar sem taldir eru kvenlegir hafa ekki sama virðingarsess í þjóðfélaginu. Ef bara er litið til launa þá eru leikskólakennari með þriggja ára háskólamenntun og tölvunarfræðingur með þriggja ára háskólamenntun ekki með sömu laun og skiptir þá engu hvort það er karl eða kona sem gegna hvorri stöðunni fyrir sig. Það sem skiptir máli í þessu er að leikskólakennari vinnur með kvenleg gildi, uppeldi, tilfinningar, umönnun og umhyggju meðan tölvunarfræðingurinn vinnur með karlleg gildi rökhugsun og skynsemi og þar af leiðandi er leikskólakennarinn með miklu miklu lægri laun.

Þess vegna segi ég, er ekki kominn tími aftur á að femínistar vinni að því að upphefja þessi gildi sem talin eru kvenleg? Ég held ekki að jafnrétti náist með því að allir einbeiti sér aðeins að karllegum gildum því þjóðfélagið starfar ekki án leikskólakennara og hjúkrunarfræðinga. Forsendan fyrir því að fólk vilji samsama sig hinum kvenlegu eiginleikum og jafnvel velja sér starf sem inniheldur þá er að þeir verði hafnir til sömu virðingar og aðrir eiginleikar og gildi.

Hvað finnst ykkur???

Steinunn Gyðu- og Guðjónsdóttir

Hugmyndasamkeppni

Jæja allir ungir femínistar,
þá er tími til að leyfa listamanninum í ykkur að láta ljós sitt skína. Nú efnum við til hugmyndasamkeppni um flott lógó og/eða slagorð sem ungliðahópurinn getur staðið undir. Keppnin mun standa út febrúar og munum við tilkynna vinningshafa inn á þessari síðu. Það lógó sem vinnur mun svo væntanlega verða prentað á boli og merki sem verður svo selt. Eins og allar aðrar femínískar vörur er hægt að selja á okkar mánaðarlegu Hittingum sem og kannski annarsstaðar eins of á stórum Femínista Hittum á Sólon og í búðinni Oni.
Allar hugmyndir skulu verða sendar til Nadiru kna@hi.is fyrir 1.mars.

Think pink!
Kveðja Nadira

Heimavinnandi femínisti?

Einhverntímann fyrir áramótin sat ég í tíma í Háskólanum með svona 50 öðrum í einum salanna í Háskólabíói. Verið var að fjalla um klám og í framhaldi af því spruttu upp umræður um femínisma. Eins og gengur og gerist eru sumir háværari en aðrir þannig að kennarinn var fljótur að loka umræðunni og halda áfram með efnið. Lokaorðin í umræðunni átti þó stúlka sem sagði: “En þessir femínistar eru bara að banna konum að vera heimavinnandi húsmæður og sjá um börnin sín.” Það hefði ábyggilega haft sömu áhrif á mig ef hún hefði staðið upp í miðri kennslustund, gengið að mér og hellt yfir mig ísköldu vatni í lítravís. Ég var furðulostin. Kennarinn var svo fljótur að drífa glærusýninguna sína áfram að enginn fékk rúm til að leiðrétta, já ég leyfi mér að fullyrða leiðrétta, þessa fullyrðingu samnemanda míns. Kannski eru núna til viðbótar 50 aðrir samnemar mínir sem standa í þeirri trú að femínistar fyrirlíti húsmæður. Ég vona ekki…

Femínistar hafa alla tíð unnið að því að opna möguleika fyrir konur en ekki loka á þá. Ef kona vill verða framkvæmdastjóri þá á hún að hafa möguleika á því, ef kona vill verða “ruslakarl” þá á hún að hafa möguleika á því, ef kona vill verða hárgreiðslumeistari á hún að hafa möguleika á því, ef kona vill verða heimavinnandi húsmóðir á hún að hafa möguleika á því!

Það sem gerst hefur á undanförnum áratugum er að konur hafa í auknum mæli fært sig inn á svið sem áður voru talin hæfa aðeins körlum. Þetta kemur fram í mörgu: Útrás kvenna á vinnumarkaðinn, í stjórnunarstöður, í raunvísindanám, í pólitík og svo framvegis. Karlar hafa hins vegar ekki sóst eftir því að færa sig inn á það svið sem áður var talið hæfa aðeins konum: Umönnun barna, hjúkrunarfræði, leikskólakennaranám, saumaskap og það að vera heimavinnandi húsfaðir. Kannski hefur þetta eitthvað með völd að gera, ef kona færir sig inn á karlasvið fær hún aukin völd, ef karl færir sig inn á kvennasvið missir hann völd. Hlutverk femínista í dag, og þá veit ég að margir eru sammála mér, er að auka völd og virðingu þeirra hlutverka sem talin eru kvenleg. Femínistar banna ekki konum að vera heimavinnandi, þvert á móti vinna femínistar að því að vekja fólk til umhugsunar um að það starf eigi að skipa alveg jafnan virðingar- og valdasess og önnur störf í þjóðfélaginu.

Steinunn Gyðu- og Guðjónsdóttir

Kjólar og buxur, buxur og kjólar...

Hugmyndir fólks um hvort jafnrétti hefur verið náð eru margar og mismunandi. Sumir halda því fram að vegna þess að það sé komið á lagalega séð þá sé málið leyst. En hlutirnir eru ekki alltaf eins í orði og á borði. Þó konur og karlar séu jafn rétthá í lagalegum skilningi þarf það ekki að endurspeglast í hversdagslífinu. Einnig er athyglisvert hvernig þróunin að þessu svokallaða jafnrétti er tilkomin.

Fyrir eitt eða tvö hundruð árum síðan gengu konur í kjólum og karlar í buxum, í dag mega konur ganga í því sem áður var álitið karlmannsföt en það gildir ekki á hinn veginn. Konur aðlagast karllægum heimi, ganga í buxum, fara inn á svið sem áður voru aðeins talin við hæfi karla og það er talið gott og blessað. Jafnrétti felst sem sagt í því að vígja konur inn í heim karla hægt og rólega en alveg er látið vera að hampa kvenlegum gildum og það sem talið er kvenleg störf eða einkenni. Þora karlar að láta sjá sig í pilsi eða kjól? Kannski Einar Ágúst úr í júróvisjón um árið en þá er það upptalið. Það að karl bendli sig við eitthvað sem er yfirlýst kvenlegt er talið neikvætt og hann verður í flestum tilfellum sér til skammar. Konur mega vera karlmannlegar (alla veganna að miklu leyti) en karlar voga sér ekki að láta bendla sig við eitthvað kvenlegt því þá bíður karlmennska þeirra hnekki og þá eru þeir í vondum málum.

Um leið og við upphefjum allt sem tengist karllægum gildum og lítum niður á hin kvenlægu erum við að takmarka líf okkar. Við erum að takmarka möguleika okkar og hvað græðum við á því? Ekki mikið. Kannski þá fölsku hugmynd um að fyrst hlutirnir séu eins og þeir eru búnir að vera áratugum og öldum saman þá hljóti þeir að vera í lagi. Hefðir eða venjur eru ekki sterk rök og í raun ansi slöpp. Ekki miklar framfarir fólgnar í því að halda í gamlar kreddur til þess eins að halda í þær.



Karlmennska og kvenleiki verða rædd þriðjudaginn 18. janúar á uppákomu ungliðahóps femínistafélagsins í Hinu Húsinu klukkan 19:30 í nýja salnum (gamla pósthúsið).

Komið og tjáið ykkur og heyrið hvað aðrir eru að hugsa.

Svenni.